(සුජිත් හේවාජුලිගේ )

විදේශ අරමුදල් යටතේ අරඹා ඇති ව්‍යාපෘති අපේක්ෂිත කාලසීමාවේ දී අවසන් කිරීමට පියවර ගන්නා ලෙස ජනාධිපති ජනාධිපති ගෝඨාභය රාජපක්ෂ මහතා  නිලධාරින්ට උපදෙස් දුන්නේය.

ඉන්දීය ණය ආධාර යටතේ සැපයෙන  මෙම පොහොර තොගය මෙරටට ලැබී   දින විස්සක් ඇතුළතදී  රටපුරා බෙදා හැරීමට සැලසුම්කර ඇතැයිද ජනාධිපතිවරයා සඳහන් කළේය.

ඔහු මෙසේ පැවසුවේ වාරිමාර්ග ක්ෂේත්‍රය  මුහුණ දෙන අභියෝග  සම්බන්ධයෙන් වාරිමාර්ග දෙපාර්තමේන්තුවේ නිලධාරීන් සමග ජනාධිපති මන්දිරයේදී පෙරේදා (1) පැවති සාකච්ඡාවේදීය.

උමාඔය සහ මොරගහකන්ද ව්‍යාපෘති මේ වසර නිමවීමට පෙර අවසන් කර මහ කන්නය සඳහා ප්‍රතිලාභ ලබාදිය හැකි බව මෙහිදී  තොරතුරු අනාවරණය විය.‍

මොරාණ, මහගල්ගමුව පෝෂිත ඇළ  මහා ගෝන වැව, විල කණ්ඩිය වැව සහ ගොඩිගමුව වැව ව්‍යාපෘතිවල වැඩද  මීට සමගාමීව   නිමවීමට නියමිතව ඇතැයි  ප්‍රකාශවිය.

සමස්ත විදුලි උත්පාදනයෙන් සියයට අසූවක් පසුගිය දින තුනේ දී ජල විදුලි පද්ධතියට එක්වූයේ  ජල සහ සුළං ප්‍රභවයන්ගෙන්  බවටද  මෙහිදී  තොරතුරු අනාවරණයවිය.

ජලය මත පාවෙන සූර්ය පැනල ව්‍යාපෘති ඉහළ නැංවීමට හා වහලය මත සවි කෙරෙන සූර්ය  පැනල  සඳහා ලබාදෙන ප්‍රතිලාභ වැඩි කර පාරිභෝගිකයන් දිරිගැන්වීමට පියවර ගත යුතු බව ජනාධිපතිවරයා මෙහිදී පෙන්වා දුන්නේය.යල කන්නයේ වගා කටයුතු සම්බන්ධයෙන්ද  මෙහිදී අවධානය යොමුවිය.

මෙහිදී අදහස් දැක්වූ වාරිමාර්ග අමාත්‍ය රොෂාන් රණසිංහ මහතා සඳහන් කළේ  වාරිමාර්ග දෙපාර්තමේන්තුව සහ මහවැලි අධිකාරිය යටතේ ජලය සපයන ඉඩම්වලින් සියයට 50ක්  මේ වනවිටත් වපුරා ඇති බවයි.

මහවැලි ගෙවතු දෙලක්ෂ විසි පන් දහසක    බෝග වගා සඳහා සැලසුම් කර ඇතැයිද   ඔහු සඳහන් කළේය. මෙතෙක් වී වගා කර නොමැති ඉඩම් වල වෙනත් බෝග වගා කිරීම සඳහා අවධානය යොමු කර ඇති බව නිලධාරීහු පෙන්වා දුන්හ.

මෙම සාකච්ඡාවට ජනාධිපති කාර්ය මණ්ඩල ප්‍රධානී අනුර දිසානායක සහ අමාත්‍යාංශ ලේකම් යූ ඩී ජයලාල්  යන මහත්වරුද  එම අමාත්‍යාංශයට අයත් රේඛීය ආයතනවල නිලධාරීහු පිරිසක්ද සහභාගි වූහ.