(සුජිත් හේවාජුලිගේ)

මන්නාරම වෙඩිතලතිව් අභයභූමිය ඇතුළත් හෙක්ටයාර 1491 ක පමණ භූමිභාගයක ඉදිකිරීමට යෝජනාවී තිබූ  ජල  ජීවී වගා කර්මාන්තපුරය ඉදිකිරීමේ ව්‍යාපෘතිය  වෙනුවෙන් ව්‍යාපෘති සැලසුම් නිෂ්පාදන සැලසුම් උපදේශන සේවා හා මිනුම් කටයුතු සඳහා ශ්‍රී ලංකා ජාතික ජල ජීවී වගා සංවර්ධන සංවර්ධන අධිකාරිය 2020 වර්ෂයේදී  වැය කර තිබූ රුපියල් දෙකෝටියකට ආසන්න මුදලක්  නාස්තිවී ගොස් ඇතැයි  ජාතික විගණන  කාර්යාලය නිකුත් කළ වාර්තාවක  සඳහන් වේ.

නාරා ආයතනයේ පරිසර වාර්තාවට අනුව විශේෂඥයින් කමිටුවක්  ව්‍යාපෘති සැලසුම    ප්‍රතික්ෂේප කර  හෙක්ටයාර 165 ක් පමණක් ඒ සඳහා නිදහස් කිරීමට තීරණය කර තිබූ බවද එම  වාර්තාවේ දැක්වේ.

විධිමත් අධීක්ෂණයකින් තොරව ස්වාභාවික  රක්ෂිත කලාපයක් තුළ හෙක්ටයාර 1491 ක භූමිභාගයක් ආවරණය වන පරිදි මෙම ව්‍යාපෘතිය ක්‍රියාත්මක කිරීමට සැලසුම් කර තිබූ බව විගණන අංශ පවසයි.

මේ අතර වැලිකන්ද අභිජනනාගාර ව්‍යාපෘතියේ ඉදිකිරීම් කටයුතු 2020 සැප්තැම්බර් 15 සිට අත්හිටුවා තිබීම හේතුවෙන් ඒ සඳහා  වැය කර තිබූ රුපියල් කෝටි 16 ක පමණ මුදලක් නාස්තිවී යෑමේ අවදානමක් පැනනැගී තිබූ බව විගණන වාර්තාවේ වැඩිදුරටත් දැක්වේ. මෙම ව්‍යාපෘතිය ආරම්භ කර තිබුණේ 2017 වර්ෂයේ මැයි 25 වැනිදාය.