(අජිත්ලාල් ශාන්තඋදය  සහ ජයන්ත නානායක්කාර)

ජනබල පක්‍ෂයට හිමිවූ පාර්ලිමේන්තු අසුන බෙදාගන්නට නොහැකිව බෞද්ධ සමාජය අපහසුතාවට පත්කරමින් භික්‍ෂූන් වහන්සේලා හැසිරීම ගැන මහා නායක ස්වාමින් වහන්සේලා සහ ශාසනභාර ස්වාමීන් වහන්සේලා වගකිව යුතු බව ශ්‍රී ලංකා රාමඤ්ඤ නිකායේ දක්‍ෂිණ ලංකාවේ ප්‍රධාන සංඝනායක ආචාර්ය ඕමල්පේ සෝභිත හිමියෝ පවසති.

'ස්වාමීන් වහන්සේලාගේ වගකීම ඉටුවනවා නම් මෙවැනි අර්බුද පැනනගින්නේ නෑ. ස්වොපහාස, අශාසනික, අධර්මවාදී සහ සමාජ වීරෝධී ක්‍රියාවන් අනාගතයේ දී වළක්වන්න මහානායක ස්වාමින් වහන්සේලා මීට වඩා ශාසනානුලෝමිකව තමන්ට පැවරුණ වගකීම මැනවින් ඉටුකළ යුතුයි' යැයි සෝභිත හිමියෝ පැවසූහ.

ඇඹිලිපිටියේ පැවති මාධ්‍ය හමුවකට එක් වෙමින්  උන්වහන්සේ මේ බව පැවසූහ. එහිදී අදහස් දැක්වූ සෝභිත හිමියෝ මෙසේ ද කීහ.

''අපේ ජනබල පක්‍ෂයට හිමිවූ ජාතික ලැයිස්තු මන්ත්‍රීධූරය සම්බන්ධයෙන් මතුවී ඇති අර්බූදකාරී තත්ත්වය ගැන හැම දෙනාගේම දුකට කළකිරිමට හේතුවක් වී තිබෙනවා. වගකිව යුතු පාර්ශව වලට අපි කියන්නේ සාමකාමීව, බෞද්ධ න්‍යාය ධර්මයන්ට අනුව සමාදානව, කාරුණිකව ක්‍රියාකරන්න කියලා. මේක තවදුරටත් ඔඩු දුවන්න ඉඩ දෙන්න එපා.

'ගලගොඩඅත්තේ ඥානසාර හිමියන් ජාතික වීරයෙක්, උන්වහන්සේ පාර්ලිමේන්තු යා යුතුමයි' කියලා වැඩිහිටි භික්‍ෂුන් වහන්සේ නමක් වූ අතුරලියේ රතන හිමියන් කලින් කිව්වා අපට මතකයි. තමන්ට පාර්ලිමේන්තු මන්ත්‍රීධූරය සම්බන්ධයෙන් ආශාවක් ඇත්තේ නෑ කියලා රතන හාමුදුරුවෝ පැහැදිලි කළා. මෙන්න මේ වචනය ඉතාම වැදගත්. ඒ අනුව ක්‍රියා කිරිම තුළින් මේ ප්‍රශ්නයට විසඳුමක් තියනවා කියන එක වැඩි දෙනාගේ මතයයි.

මේ පක්‍ෂයට 67,000ක් ඡන්දය දුන්නා. නමුත් මේ ප්‍රශ්නය 67,000ට සීමාවුණ එකක් නෙවෙයි. සමස්ත බෞද්ධ සමාජයටම, ගිහි පැවිදි හැම කෙනාටම, බලපාන ප්‍රශ්නයක්. එයින් මේ කාතුලත් ඇතිවෙලා තියෙන්නේ කළකිරීමක්. දුකක්. වේදනාවක්. එය බෞද්ධ සමාජයට විදින්න ඉඩ නොදී නායකත්වය ගෙන ආදර්ශවත් ලෙස අතුරලියේ රතන හිමි ක්‍රියාකළොත් ප්‍රශ්නයට විසඳුමක් ලැබෙයි කියලා අපි හිතනවා.

බලලෝභය බළකාමය කියන සංකල්ප අපි ප්‍රතික්‍ෂේප කරන දේවල්. භික්‍ෂූත්වයට, ධර්මයට, පරාර්ථයට මුල්තැන දීලා ක්‍රියා කළොත් මේ ගැටලුවට ඉතාමත් ඉක්මණින් විසඳුම් ලැබෙනවා කියලා විශ්වාසයකුත් අපට තියනවා'' යැයිද ආචාර්ය ඕමල්පේ සෝභිත හිමියෝ පැවසූහ.