(අංජුල මහික වීරරත්න)

බස්නාහිර පළාත කේන්ද්‍ර කර ගනිමින් රැකියා පොළක් පවත්වන්නට විදේශ සේවා නියුක්ති කාර්යාංශය තීරණය කර තිබේ.

ශ්‍රී ලංකා විදේශ සේවා නියුක්ති කාර්යාංශය පළාත් මට්ටමින් මෙම රැකියා පොළ පවත්වනු ලබයි.

එම බස්නාහිර පළාත් රැකියා පොළ ගම්පහ, යසෝදරා දේවී  බාලිකා විද්‍යාල පරිශ්‍රයේදී සෙනසුරාදා (23) පෙරවරු 9 සිට පස්වරු 4 දක්වා  පැවැත්වීමට නියමිතය.

මෙම රැකියා පොළ වැඩසටහනේදී තරුණ තරුණියන්ට විදේශ රැකියා අවස්ථා සඳහා අයැදුම් කිරීමට අවස්ථාව හිමිවන අතර එදින සහභාගී වන විදේශ රැකියා අපේක්ෂිතයින් කාර්යාංශ රැකියා බැංකුවේ ලියාපදිංචි කරගැනීමද සිදුකරනු ලබයි. 

ඊට අමතරව ශ්‍රී ලංකා රජය, ජපානය, ඊශ්‍රායල් හා දකුණු කොරියා රජයන් සමග ඇතිකරගත් අවබෝධතා ගිවිසුම් අනුව ලබාදෙනු ලබන විදේශ රැකියා අවස්ථා පිළිබඳව දැනුවත් කිරීමද මෙහිදී සිදුකෙරේ.

කාර්යාංශයේ බලපත්‍රලාභී විදේශ රැකියා නියෝජිතායතන 25 ක් මේ සඳහා සහභාගිවන අතර, එම ආයතන වෙත ලැබී ඇති විදේශ රැකියා අවස්ථා පිළිබඳව තොරතුරු ලබාගැනීමට, ඒ සඳහා අයැදුම් කිරීමට හා රැකියා ලබාගැනීමට අවස්ථාව සලසා දී තිබේ. මෙහිදී රැකියා සඳහා සෘජු බඳවාගැනීම් සිදුකිරීමටද නියමිතය.

මීට අමතරව බස්නාහිර පළාතේ විගමණික ශ්‍රමිකයින්ගේ දරුවන් 123 දෙනෙකු සඳහා රුපියල් මිලියන 3.75 ක් වටිනා ශිෂ්‍යත්ව ප්‍රදානය කිරිමද මෙම වැඩසටහනට සමගාමීව සිදුකෙරේ.

ශ්‍රී ලංකා විදේශ සේවා නියුක්ති කාර්යාංශයේ බස්නාහිර පළාත් කාර්යාලය හා අලෙවිකරණ අංශය එක්ව මෙම රැකියා පොළ වැඩසටහන සංවිධානය කර ඇති අතර, ඉදිරියේදී අනෙකුත් පළාත්වලද මෙම වැඩසටහන පැවැත්වීමට කාර්යාංශය අපේක්ෂා කරයි.