(ශාන්ත ප්‍රදීප් කුමාර කුලරත්න)

නිවසකට අනතුරුදායක ලෙසින් පිහිටා තිබූ පොල් ගසක්  කම්බියකින් බැඳ , ඇද දැමීමට ගසට නැගි අවස්ථාවේදී   , එම ගස මුලින් ඉදිරී , යාබද නිවසක් මතට වැටීමෙන් , අඩි තිහක් පමණ උසින්  බිමට වැටුණු පුද්ගලයකු  අද   (21)  ,  ජීවිතක්ෂයට පත්ව ඇතැයි හෝමාගම පොලිසිය පවසයි .

මෙසේ මියගොස් ඇත්තේ , හෝමාගම, ශ්‍රී මහින්ද මාවතේ , අංක 730 / බී , හි පදිංචි , පෙරුම්බුලි අච්චිගේ සිරිදාස (69) හැවිරිදි අවිවාහකයකු බව පොලීසිය කියයි.
හෝමාගම රෝහල ආසන්නයේ පිහිටි ඉඩමක , යාබද නිවසකට අනතුරුදායක ලෙසින් පිහිටා තිබූ , පොල් ගසක් කම්බියකින් බැද , ඇද , ගැට ගැසීම සඳහා , තවත් පුද්ගලයෙකු සමඟ ගොස්  , ගසට නැග , කම්බිය ගැට ගැසීමට , සූදානම් වන අවස්ථාවේදී  , නැග සිටි පොල් ගස , මුලින් ඉදිරී , යාබද නිවසේ වහලය මතට වැටී අනතුරක් සිදුව ඇති බව පැවසේ .

අනතුර වූ පොල් ගසෙහි , මුල දිරාපත්ව අනතුරුදායක ලෙසින් පිහිටා තිබී ඇති අතර , ඒ බව නොදත් මෙම පුද්ගලයා ගසට නැග ඇති  බවත් ගස වැටීමෙන් එම නිවසේ  වහලයේ කොටසකට හානි සිදුව ඇති බවත් , පැවසේ . ගස බිමට වැටෙනවාත් සමගම , ගසෙහි වූ දෙදරීම හේතුවෙන් , ගසට නැගි පුද්ගලයා ඉන් විසිවී,  අඩි තිහක් පමණ උසක සිට , විසි වී , මීටර් දහයක් පමණ දුරින්  ,  බිමට වැටී , සිරුරේ අභ්‍යන්තරයට හානි සිදුව තිබූ බව පොලීසිය කියයි .

ඒ සමගම අනතුරට පත් පුද්ගලයා අසල්වාසීන්ගේ ද සහය ඇතිව ප්‍රතිකාර සඳහා හෝමාගම මූලික රෝහලට ඇතුළත් කර ඇති අතර , එහිදී මූලික ප්‍රතිකාර ඒකකයේ  වෛද්‍යවරුන් රෝගියා  පරීක්ෂා කොට පවසා ඇත්තේ , ඔහු මිය ගොස් ඇති බවයි .