(අංජුල මහික වීරරත්න)

නවක හෙද හෙදියන් 294 දෙනකු සෞඛ්‍ය සේවාවට ඇතුලත් කර ගැනීමට රජය තීරණය කර ඇත.

එම පත්වීම් ලිපි ප්‍රදානය කොළඹ ජාතික රෝහලේ නව බාහිර රෝගී අංශ පළමු මහලේ ශ්‍රවණාගාරයේ දී අද(10) පැවැත්වීමට කටයුතු යොදා ඇත.

එමෙන්ම වාග් චිකිත්සක නිලධාරීන් 9 දෙනෙකු  සහ ඖෂධවේදීන් 6 දෙනෙකු ද සෞඛ්‍ය සේවවාට ඇතුලත් කර ගැනීමේ පත්වීම් ලිපි ද  මෙහි දී ප්‍රදානය කිරීමට නියමිතය.‍

තුන්වන ශ්‍රේණියේ හෙද නිලධාරීන් ලෙස  පත්වීම් ලබන මෙම නවක හෙද නිලධාරීන් 2019 සිසු හෙද කණ්ඩායම යටතේ තුන් අවුරුදු හෙද පුහුණු පාඨමාලාව සාර්ථකව නිම කරන ලද සිසු හෙද හෙදියන් වේ.

වාග් චිකිත්සක නිලධාරීන් මෙරට පිළිගත් විශ්ව විද්‍යාලයක කතන හා භාෂා චිකිත්සක විශේෂවේදී  උපාධිය සම්පූර්ණ කර ඊට අමතරව සෞඛ්‍ය අමාත්‍යාංශය මඟින් පවත්වන ලද විභාගය සමත් වී අවශ්‍යවන සියලු සුදුසුකම් සම්පූර්ණ කරන ලද නිලධාරීන් වේ.

ඖෂධවේදීන් ලෙස පත්වීම් ලබන මෙම නිලධාරීන්  වසර දෙකක ඖෂධවේදී ඩිප්ලෝමාව සාර්ථකව නිමකරන ලද හා අවශ්‍යවන අනෙකුත් සියළු සුදුසුකම් සම්පූර්ණ කරන ලද නිලධාරීන්ය.

මේ වන විට සෞඛ්‍ය ක්ෂේත්‍රයේ හෙද නිලධාරීන් 43500 කට ආසන්න  ප්‍රමාණයක් ද, වාග් චිකිත්සක නිලධාරීන් 100 කට ආසන්න ප්‍රමාණයක් ද, ඖෂධවේදීන් 2000 කට ආසන්න ප්‍රමාණයක්ද මෙරට ජනතාව සුවපත් කිරීමට දායකත්වය සපයනු ලබයි.