(යොහාන් භාසුර සහ ටී.කේ.ජී.කපිල)

නොර්වේහි ඔස්ලෝ නුවරදී පැවැති ලෝක ශූරතා මල්ලවපොර තරගාවලියට සහභාගි වූ ශ්‍රී ලංකා කණ්ඩායමේ කළමනාකරු ලෙස කටයුතු කළ ඩොනල් ඉන්ද්‍රවංශ මහතා එහිදී අතුරුදහන් වී ඇති බව ක්‍රීඩා අමාත්‍යංශයේ උසස් නිලධාරියෙක් ‘ලංකාදීප’යට පැවසීය.

ශ්‍රී ලංකා මල්ලවපොර කණ්ඩායම ශ්‍රී ලංකාවට පැමිණීමට පෙර දින ඔහු අතුරුදහන් වී ඇති බවත් එම තරගාවලියට සහභාගි වූ කණ්ඩායමේ සෙසු සියලුම සාමාජිකයන් නැවත ශ්‍රී ලංකාවට පැමිණී බවත් එම නිලධාරියා කීය.

ක්‍රීඩා අමාත්‍යංශයේ මූල්‍ය අනුග්‍රහයෙන් මෙම තරග සංචාරයට සහභාගි වූ ශ්‍රී ලංකා මල්ලවපොර කණ්ඩායමට ක්‍රීඩක ක්‍රීඩිකාවන් පස්දෙනකු ඇතුළු සාමාජිකයන් හත් දෙනකු ඇතුළත්ව සිටි බව කී එම නිලධාරියා එම කණ්ඩායම පසුගිය සැප්තැම්බර් මස 30 වැනිදා ශ්‍රී ලංකාවෙන් පිටත්ව ගිය බව ද සඳහන් කළේය.

ලෝක ශූරතා මල්ලවපොර තරගාවලිය මේ මස 2 වැනිදා ආරම්භ විය.