(ඉන්දිකා රාමනායක)

 

මහාපරිමාණ නීති විරෝධී මත්පැන්  ජාවාරම්කරුවන් උපයාගත් දේපළ හා මුදල්  ඉදිරියේ මුදල් විශ්‍රද්ධිකරණ පනත යටතේ  රාජසන්තක  කිරීමට අවශ්‍ය පියවර ගන්නා  බව පොලිස් මාධ්‍ය ප්‍රකාශක  ජ්‍යෙෂ්ඨ පොලිස් අධිකාරි  ජාලිය සේනාරත්න මහතා අද (14) පැවසීය.

සංවිධානාත්මක අපරාධ හරහා උපයාගත් දේපළ හා මත්ද්‍රව්‍ය ජාවාරම්කරුවන්ගේ  දේපළ හා ගිණුම් තහනම් කරන ආකාරයකටම  නීතිවිරෝධී මත්ජාවාරම්කරුවන්ගේ දේපළ ද ඉදිරියේ තහනම් වන බවද  ජාලිය සේනාරත්න මහතා කියා සිටියේය.

මේ සදහා වැඩබලන පොලිස්පතිවරයා විසින් බස්නාහිර පළාත ජ්‍යෙෂ්ඨ නියෝජ්‍ය පොලිස්පතිවරයාට,   වලාන මධ්‍යම  දුෂණ මර්දන  ප්‍රහාරක ඒකකයේ  අධ්‍යක්ෂවරයාට හා විශේෂ  කාර්ය බළකායේ අණදෙන නිලධාරීවරයාට  අවශ්‍ය උපදෙස් ලබා දී ඇති බවද පොලිස් මාධ්‍ය ප්‍රකාශකවරයා  සඳහන් කළේය.

මේ අතර නීති විරෝධී මත්ද්‍රව්‍ය ජාවාරම්කරුවන්  පසුගිය  සති දෙකක කාලය තුළ මත්ද්‍රව්‍ය ජාවාරම් හරහා  රුපියල් කෝටි 220 ට අධික ප්‍රමාණයක මුදලක් ගිණුම් හරහා සංසරණය කර ඇති බවට හෙළි ව ඇති බවද  පොලිස් මාධ්‍ය ප්‍රකාශකවරයා කියා  සිටියේය.

මෙම මුද, විදේශ රටවලට ජාවාරම්කරුවන් අතට පත් කර ඇති ද,  මෙම මුදල් ආයෝජනය කර ඇත්තේ කවුද, යන්න හෙළි කර ගැනීම සදහා පරීක්ෂණ පවත්වන බවද ජාලිය සේනාරත්න මහතා කියා සිටියේය.

නීතිවිරෝධී මත්පැන් පෙරීමේ ස්කාගාර 11 ක් පමණ  පසුගිය මාසය තුළ වැටලු බවද හෙතෙම  කියා සිටියේය.

පොලිස් මාධ්‍ය ප්‍රකාශක නීතිඥ ජාලිය සේනාරත්න මහතා මේ බව ප්‍රකාශ කළේ අද පොලිස් මුලස්ථානයේ පැවති විශේෂ මාධ්‍ය හමුවකදී ය.