(මහේෂ් කිර්තිරත්න)

නකලස්  පාරිසරික  ආරක්ෂණ කලාපයේ  මාතලේ දිස්ත්‍රික්කයට  අයත් පෞද්ගලික ඉඩම් අක්කර  1600ක් වන සංරක්ෂණ දෙපාර්තමේන්තුවට අත්පත් කරගැනීමේ කටයුතු  කඩිනමින් අවසන් කරන බව මාතලේ අතිරේක දිස්ත්‍රික් ලේකම් ඉෂාන් විජේතිලක මහතා  පැවසීය.

වන සංරක්ෂණ දෙපාර්තමේන්තුවට අයත් නකලස්  පාරිසරික ආරක්ෂණ කලාපය තුළ පිහිටි පෞද්ගලික ඉඩම් අත්පත් කරගැනීමේ වැඩසටහනේ ප්‍රගති සමාලෝචන රැස්වීමට සහභාගී වෙමින් මේ බව පැවසීය. 

නක්ලස්  සංරක්ෂණ කලාපයට අයත් ඉඩම් ප්‍රමාණය හෙක්ටයාර් 31,000 ක් පමණ වන අතර  එයින් හෙක්ටයාර්  15,000ක් මාතලේ දිස්ත්‍රික්කයට අයත් වන අතර  ඉතිරිය  මහනුවර දිස්ත්‍රික්කයට අයත් වේ. 

නක්ලස් සංරක්ෂිත කලාපයේ මාතලේ  පිටවල පතන ආශ්‍රිතව  ඇති ගෝනමඩවත්ත  නම් ප්‍රදේශයේ  පෞද්ගලික ඉඩම්  අක්කර  1600ක  ප්‍රමාණයක්  අත්පත් කරගැනීමේ කටයුතු  මේ දිනවල සිදුවෙමින් පවතී. 

මෙම  පෞද්ගලික  ඉඩම් ‌ අත්පත් කරගැනීමේදී  අයිතිකරුවන් සොයා ගැනීමට  අපහසු වීම, අයිතිකරුවන් ඉදිරිපත් නොවීම වැනි ගැටලු ද පවතින බව මෙම ප්‍රගති සමාලෝචන  රැස්වීමේදී  අනාවරණය විය. 

ලග්ගල ප්‍රාදේශීය ලේකම්  කාර්යාලය මගින්  අත්පත් කරගැනීමේ  කටයුතු සිදු කරනු ලබයි.  මේ වන විට ගෝනමඩවත්ත  පෞද්ගලික ඉඩම්  මිනුම් කටයුතු කර  තක්සේරු  කිරිමේ කටයුතු  අවසන් අදියරේ පවතී.  මෙම ඉඩම් පෞද්ගලික අයිතිය යටතේ  පැවැතිය ද එම ඉඩම්වල සංවර්ධන කටයුතු සිදුකර නොතිබීමෙන්  අත්පත් කරගැනීමේ කටයුතු පහසු වී ඇති බවත් අතිරේක දිස්ත්‍රික් ලේකම්වරයා  ප්‍රකාශ කළේය.  

මෙම ප්‍රගති සමාලෝචන රැස්වීම සඳහා  ඉඩම් අමාත්‍යාංශයේ  සහකාර අධ්‍යක්ෂ (අත්පත්කරගැනීම්)  කෝකිලා හේමචන්ද්‍ර ,  ලග්ගල ප්‍රාදේශීය ලේකම්  එස්. විජේකුමාර් ,  නියෝජ්‍ය වන සංරක්ෂක  ප්‍රියන්ත සේනාධීර,  මාතලේ දිසා වන නිලධාරි  ඒන්.ආර් ප්‍රසාද්,  දිසාවන  නිලධාරි අශෝක බණ්ඩාර හේරත්,  වන පාලක කේ.ආර්.ඉලුක්කුඹුර  යන මහත්ම මහත්මින් ඇතුළු  නිලධාරින් රැසක් සහභාගී වූහ.