(ඩයනා උදයංගනී)‍

මෙරට භාවිතය තහනම් කර ඇති නීතිවිරෝධී පොලිතීන් “ලන්ච් ෂීට්” කිලෝ ග්‍රෑම් 100ක පමණ තොගයක් ඉකුත් 13 වැනිදා ගාල්ල නගරයේ දී සිදුකළ වැටලීමකින් අත්අඩංගුවට ගත් බව මධ්‍යම පරිසර අධිකාරිය පවසයි.

මධ්‍යම පරිසර අධිකාරියේ ප්‍රධාන කාර්යාලයේ විමර්ෂණ අංශයට ලද තොරතුරක් අනුව එම අධිකාරියේ දකුණු පළාත් කාර්යාලය, ගාල්ල පොලීසිය සහ පාරිභෝගික කටයුතු පිළිබඳ අධිකාරිය සමඟ එක්ව මෙම වැටලීම සිදුකර ඇත.

එම පොලිතීන් තොගයේ හිමිකරුට එරෙහිව ජාතික පාරිසරික පනතේ විධිවිධාන යටතේ නීතිමය පියවර ගැනීමට කටයුතු කරන බව මධ්‍යම පරිසර අධිකාරිය සඳහන් කරයි.

දනීතියෙන් තහනම් කර ඇති ග්‍රෑම් 20 හෝ මිලිලීටර් 20ට අඩු සැෂේ පැකට්, හුලං පුරවන ලද සෙල්ලම් බඩු, ප්ලාස්ටික් කූර සහිත කොට්න් බඩ්ස් සහ මයික්‍රෝන 20ට අඩු පොලිතීන් නිෂ්පාදන විකිනීම, ප්‍රදර්ශනය, නිෂ්පාදනය සහ භාවිතය ජාතික පාරිසරික පනත යටතේ නීතියෙන් තහනම් කර ඇති අතර මේ සම්බන්ධයෙන් දිවයින පුරා අඛණ්ඩ වැටලීම් සිදුකරන බව මධ්‍යම පරිසර අධිකාරිය කියයි.