(ශාන්ත චන්ද්‍රසිරි හුලංනුගේ)

තලවකැලේ ප්‍රාදේශීය ලේකම් කාර්යාලය සඳහා ඉඩකඩ සහිත ගොඩනැගිල්ලක් ලබා දෙන ලෙස ඉල්ලමින් එහි සේවකයෝ අද (29) විරෝධතාවයක නිරත වූහ.

තම කාර්යාලයේ ගොඩනැගිලි තුළ පවතින ඉඩකඩ සීමා වීම හේතුවෙන් මෙහි සේවය ලබා ගැනීමට පැමිණෙන ජනතාව මෙන්ම එහි සේවයේ නිරත තමන් දෛනිකව දැඩි අපහසුතාවයන්ට හා විවිධ දුෂ්කරතාවයන්ට ලක්ව සිටින බව  සේවකයෝ පවසති.

දෛනිකව මෙහි සේවය ලබා ගැනීමට විශාල පිරිසක් පැමිණෙන බවත්, කුඩා ඉඩක් ඇති උඩු මහලට එවැනි විශාල පිරිසක් පැමිණීමේදී තමන්ට නිසි පරිදි හුස්ම   ගැනීමට පවා නොහැකිවීමෙන් නිසි පරිදි රාජකාරි කටයුතු සිදු කිරීම අපහසුව ඇති  බව විරෝධතාවේ නිරත සේවකයෝ සඳහන් කරති.

තම ආයතනයට සේවය ලබා ගැනීමට වයසක පිරිස්, ගැබිනි මව්වරුන් ආබාධිතයන් පැමිණෙන බවත්, කාර්යාලයේ ඔවුන්ට අසුන් ගැනීමට මෙන්ම වැසිකිළි පහසුකම් නොමැති වීමෙන් එම ජනතාව දැඩි දුෂ්කරතාවයන්ට ලක්ව සිටින බවද සේවකයෝ පවසති.

ග්‍රාම සේවා වසම් 34ක දස දහසකට අධික විශාල පිරිසක් මෙහි සේවය ලබා ගැනීමට දෛනිකව පැමිණෙන බවත්, තම සේවා වාරය එන තුරු ඔවුන්ට රැඳී සිටීමට පවා ස්ථානයක් නොමැති වී ඇතැයි එහි විරෝධතාවයේ නිරතව සිටි සේවකයෝ පෙන්වා දෙති.