‘‘තේ වලට කාබනික පොහොර ගැලපෙන්නේ නෑ‘‘

(සුජිත් හේවාජුලිගේ සහ  අංජුල මහික වීරරත්න)

කාබනික පොහොර ප්‍රශ්නය නිසා  වතුකරයේ  නොසන්සුන් තත්වයක් ඇතිවීමේ අවදානමක් ඇතැයි රත්නපුර දිස්ත්‍රික් මන්ත්‍රී ඩබ්ලිව් ඩී ජේ සෙනවිරත්න මහතා පාර්ලිමේන්තුවේදී අද (7) පැවැසීය.

තේවලට කාබනික පොහොර නොගැළපෙන බවත් තේ වගාවට කාබනික පොහොර යෙදීම නිසා අස්වැන්න  අඩුවීමෙන්  වතුකර ජනතාවගේ   රැකියා ඉදිරියේදී අහිමිවීමේ අවදානමක් ඇති බවත් හෙතෙම සඳහන් කළේ‍ය.

සෙනවිරත්න මහතා මෙසේ පැවසූවේ  සේවක අර්ථසාධක අරමුදල් (සංශෝධන) පනත් කෙටුම්පත පිළිබඳ විවාදයේදීය.

මේ ප්‍රශ්නයට පිළියමක්  වහාම ලබා නොදුනහොත්  විදේශ විනිමය අහිමිවීමේ අවදානමක්ද  ඇතිවන  බව පැවසූ හෙතෙම පොහොර  ප්‍රශ්නයට කඩිනමින් විසඳුමක් ලබා දෙන්නැයි තමා  අදාළ ඇමැතිවරුන්ගෙන් ඉල්ලීමක් කරන බවද  ප්‍රකාශ කළේය.

සාකච්ඡාවලදී තමා  මෙම අවදානම  පෙන්වා දුන්නත් තවමත් විසඳුමක් ලැබී නැතැයිද ඔහු පැවසුවේය.

තේවලට  කාබනික පොහොර නොගැළපෙන බවත්  මේ සම්බන්ධයෙන් රජය වහාම අවධානය යොමු කළ යුතු බවත්  සෙනවිරත්න මහතා ප්‍රකාශ කළේය.

වෙනත් බෝග වගා වලට කාබනික පොහොර ගැළපුණත් තේ වලට  කාබනික පොහොර සුදුසු නැති බවද  ඔහු කීවේය.

මේ අතර  විදෙස් සේවා නියුක්ති කාර්යාංශයේ ඇතැම් නිලධාරීන්ගේ ක්‍රියා කලාපය  තමා අනුමත නොකරන බව  ඩබ්ලිව් ඩී ජේ සෙනවිරත්න මහතා වැඩිදුරටත් පැවැසීය.