(අංජුල මහික වීරරත්න)

තරුණ කටයුතු නියෝජ්‍ය අමාත්‍ය ලෙස පත්වූ දිනිඳු සමන් හෙන්නායක මහතා තරුණ කටයුතු සහ ක්‍රීඩා අමාත්‍යාංශයේ දී අද(13) ධුරයේ රාජකාරී ආරම්භ කළේය. 

මෙහි දී අදහස් දැක් වූ තරුණ කටයුතු සහ ක්‍රීඩා අමාත්‍ය සුනිල් කුමාර ගමගේ මහතා  පැවසුවේ වෙනස් වූයේ වගකීම් මිස තනතුරු නොවන බවයි. 

තරුණ කටයුතු නියෝජ්‍ය අමාත්‍යවරයා ලෙස එරංග ගුණසේකර මහතා  ක්‍රියාත්මක කළේ ජාතික ජන බලවේගයේ ප්‍රතිපත්තිය බවත්, නව තරුණ කටයුතු නියෝජ්‍ය අමාත්‍යවරයාට ද පැවරෙන්නේ එම ප්‍රතිපත්තිය මත හිඳිමින් කටයුතු කිරීම බවත් ඔහු සඳහන් කළේය. 

නව අමාත්‍යවරුන් පැමිණ සිටින්නේ වසර 5ක කොන්ත්‍රාත්තුවක් ක්‍රියාත්මක කිරීමට නොවන බව කී අමාත්‍යවරයා  මේ  සියලුම දෙනාගේ රට යැයි යන හැඟීමෙන් කටයුතු කිරීම සියලුම දෙනාට පැවරෙන වගකීමක් බව  ප්‍රකාශ කළේය. 

මෙහිදී අදහස් දක්වමින් නව තරුණ කටයුතු නියෝජ්‍ය අමාත්‍ය දිනිඳු සමන් මහතා  පැවසුවේ  තරුණ කටයුතු අංශය හිටපු නියෝජ්‍ය අමාත්‍යවරයා ඔසවා තැබූ තැනින් තවත් පියවර කිහිපයක් ඉදිරියට ගෙනයාම තම අරමුණ බවයි. ජාතික තරුණ සේවා සභාව, ජාතික යොවුන් සේනාංකය වැනි ආයතන රටේ පොදු තරුණයාගේ ස්ථානයක් බවට පත්කිරීමට උපරිම කැපවීමෙන් කටයුතු කරන බව ද ඔහු සඳහන් කළේය.