(ඩයනා උදයංගනී)

මූල්‍ය අරමුදලේ සහය හා ණය ප්‍රතිව්‍යුහගතකරණය කිරීමේ අවස්ථාව ලබාගැනීමට ජනතාව විශාල කැපකිරීමක් කළ බවත්, එය යම් ආකාරයකින් කඩාකප්පල් කළහොත් රට කොතැන නවතීදැයි කිව නොහැකි බවත් කැබිනට් ප්‍රකාශක, ප්‍රවාහන, මහාමාර්ග සහ ජනමාධ්‍ය අමාත්‍ය, ආචාර්ය බන්දුල ගුණවර්ධන මහතා පැවසීය.

රට දරුණු අගාධයකට වැටීම වළක්වාගැනීමට නම් ජාත්‍යන්තර මූල්‍ය අරමුදලේ සහය හැර වෙනත් විකල්ප නැතැයි කී ඇමතිවරයා රජයට කළ නොහැකි දේ ඉල්ලා කරන උද්ඝෝෂණ නිසා එම වැඩපිළිවෙල කඩාකප්පල් වුවහොත් රට අන්ත අගාධයකට වැටෙනු ඇතැයි සඳහන් කළේය.

ඒ නිසා රට තිබුණු තැනින් ගොඩගෙන ජාත්‍යන්තරව පිළිගත හැකි තැනකට ගෙනඒම සඳහා සියලු දෙනා කෙටි කාලයක් ඉවසීමෙන් හා වගකීමෙන් කටයුතු කළ යුතු බව ඇමතිවරයා කීවේය.

ඇමතිවරයා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද (8) පැවති කැබිනට් තීරණ දැනුම්දීමේ මාධ්‍ය හමුව අමතමිනි.

උසාවි නියෝග පවා නොතකමින් කරන උද්ඝෝෂණ නිසා සංචාරකයන් රටට පැමිණීමට බිය වන බව ද හෙතෙම පැවසීය.

ණය ප්‍රතිව්‍යුහගතකරණය කරගැනීම සඳහා ගෝඨාභය රාජපක්‍ෂ ජනාධිපතිවරයාගේ කාලයේ සිට විශාල වෙහෙසක් දැරූ බවත්, මේ වන විට වත්මන් ජනාධිපතිවරයාගේ මැදිහත්වීමෙන් චීනය ද ඊට එකඟ වී ඇති බවත් බන්දුල ගුණවර්ධන මහතා ප්‍රකාශ කළේය.

බදු ප්‍රතිපත්තිය, මිල ගැලපුම් කිරීම් යටතේ ජනතාවට පීඩාවක් සහිතව වුවත් කැපකිරීම් නොකළා නම් දැන් මූල්‍ය අරමුදලේ විස්තීරණ ණය ගිවිසුමට ඇතුළත්වීමට අවශ්‍ය මූලික පියවර සඳහා ලැබුණු අවස්ථාව නොලැබෙන බවත්, එසේ නොවුණා නම් ණයවර ලිපි නිකුත් කරන්න බැරි වී ඛනිජතෙල්, ගෑස්, පොහොර, බෙහෙත් නැති රටක් බවට ශ්‍රී ලංකාව පත්වීමට නියමිතව තිබූ බවත් ඇමතිවරයා කීවේය.