(ගයාන් සූරියආරච්චි)

පොලිස් ත්‍රස්ත විමර්ශන ඒකකයේ නිලධාරීන් ලෙස පෙනී සිටිමින් යාපනය ප්‍රදේශයේ රන්බඩු වෙළදසලක් පරීක්ෂාකර එම රන්බඩු එල්.ටී.ටී.ඊ සංවිධානයට අයත් ඒවා බව පවසා අධිකරණයට ඉදිරිපත් නොකර සිටීම සදහා වෙළෙදසල් හිමිකරුගේ රුපියල් ලක්ෂ 30 ක මුදලක් ලබාගත් සැකකරුවන් තිදෙනකු සොයා පොලිස් විමර්ශන ආරම්භ කර ඇතැයි යාපනය පොලිසිය පවසයි.

සැකකරුවන් විසින් එම වෙළෙදසලේ තිබූ සී.ටී.ටී.වී දර්ශන පටිගත වන උපාංග ද ගලවාගෙන ගොස් ඇති බව පොලිසිය කියයි.

යාපනය , කස්තුරියා ප්‍ර දේශයේ පදිංචි පුද්ගලයකු විසින් යාපනය පොලිසියට කළ පැමිණිල්ලකට අනුව යාපනය පොලිසිය විමර්ශන ආරම්භ කර ඇත.

සැකකරුවන් තිදෙනා කොළඹ ත්‍රස්ත විමර්ශන ඒකකයේ නිලධාරීන් ලෙස පෙනී සිටිමින් පැමිණිලිකරුගේ රන්බඩු වෙළෙදසලට පැමිණ වෙළෙදසල පරීක්ෂා කිරීමෙන් පසුව එම වෙළෙදසලෙහි ඇති රන් භාණ්ඩ එල්.ටී.ටී.ඊ සංවිධානයෙන් ලබාගත් රන් භාණ්ඩ බව පවසා වෙළෙදසල් හිමිකරු බියගන්වා ඇති බව පොලිසිය කියයි.

පසුව සැකකරුවන් තිදෙනා එම රන් බඩු කොළඹ අධිකරණයට ඉදිරිපත් කිරීමට රැගෙන යන බවද පවසා එසේ නොකර සිටීම සදහා රුපියල් ලක්ෂ 35 ක මුදලක් ඉල්ලා ඇති අතර පසුව පැමිණිලිකරු රුපියල් ලක්ෂ 30 ක මුදලක් සැකකරුවන්ට ලබාදී ඇති බව පොලිසිය පවසයි.

අනතුරුව සැකකරුවන් විසින් එම ස්ථානයේ තිබූ සී.සී.ටී.වී දර්ශන පටිගත වන උපාංගද ගලවාගෙන ගොස් ඇති බව පොලිසිය කියයි.

සිද්ධිය සම්බන්ධයෙන් සැකකරුවන් අත්අඩංගුවට ගැනීම සදහා යාපනය පොලිසිය විමර්ශන ආරම්භ කර ඇත.

යාපනය දිසාව බාර නියෝජ්‍ය පොලිස්පති කාලිංග ජයසිංහ මහතාගේ උපදෙස්  පරිදි සහකාර පොලිස් අදිකාරී දිස්ත්‍රික් (I) ජරූල් මහතාගේ මගපෙන්වීමෙන් පරිදි යාපනය මූලස්ථාන ප්‍රධාන පොලිස් පරීක්ෂක චම්ලි පලිහේන මහතාගේ ප්‍රධානත්වයෙන් අපරාධ විමර්ශන අංශයේ ස්ථානාධිපති උප පොලිස් පරීක්ෂක ඉන්දික අබේගුණසේකර යන මහත්වරු  වැඩිදුර  විමර්ශනවලදී සිදුකරති.