(නිමල කොඩිතුවක්කු)      

සයිටම් ආයතනය වෙනුවට වෙනත් විකල්ප ආයතනයක් ස්ථාපිත කිරීමේ උත්සාහයක රජය නිරත වන බවත් සියලූ බලවේග සමග එක්වෙමින් සයිටම්වලට වැඩි ප‍්‍රතිරෝධයක් එම නව ආයතනය සඳහා යොදවන බවත් රජයේ වෛද්‍ය නිලධාරීන්ගේ සංගමයේ ලේකම් වෛද්‍ය හරිත අලුත්ගේ මහතා අද(4) පැවසීය.

සයිටම් ආයතනය අහෝසි කිරීමත්  එම ආයතනයේ  දැනට ඉගෙනුම ලබන  පිරිසට සාධාරණ විසදුමක් ලබාදීමත් ජනාධිපති කමිටුවේ ප‍්‍රධාන කාර්යය විය යුතු බවද ඒ මහතා කීවේය.

රජයේ වෛද්‍ය නිලධාරීන්ගේ සංගමය විද්වත් වෘත්තිකයන්ගේ සංගම් ගොඩනැල්ලේ කැඳවූ මාධ්‍ය හමුවකට එක්වෙමින් හෙතෙම මේ බව පැවසීය.

‘‘සයිටම් ගැටලූව සම්බන්ධයෙන් ජනාධිපති කමිටු වාර්තාව පසුගිය ඔක්තෝම්බර්  29 වැනිදා ප‍්‍රකාශ කළා. අපි එයට ක්ෂණිකව  අපේ ප‍්‍රතිචාර දැක්වුවා. එහි සාධනීය යෝජනා කිහිපයක්ම තිබුණා. ඒ වගේම  එම වාර්තාව තුළ නිවැරදි විය යුතු කරුණු රැසක් තිබුණා. අපි කරපු නිරීක්ෂණ පිළිබඳ අමාත්‍ය හර්ෂද සිල්වා මහතාට අපි ලිපියක් යොමු කළා. ඔක්තෝම්බර්  29 වැනිදා රජයේ පැත්තෙන් ඉදිරිපත් වෙච්ච එක කාරණාවක්  තමයි මේ සයිටම් කියන ආයතනය  අහෝසි කර නව ආයතනයක් බිහිවෙනවා කියපු කාරණාව. එතනදි  රජය කියනවා  මෙම නව ආයතනය ලාබ නොලබන එකක් වෙන්න ඕන කියලා.  තව පැත්තකින් කියනවා මේක රාජ්‍ය නොවන එකක් කියලා. එය වෙනත් වචන වලින් කිව්වොත් පෞද්ගලික වෛද්‍ය පීඨයක් අලූතින් ස්ථාපිත කිරීමේ උත්සාහයකද මේ නිරත වෙන්නෙ කියන ගැටලූව මතුවෙනවා‘‘ යැයි ද ඔහු කීය.