(පාලිත ආරියවංශ)
මොණරාගල දිස්ත්‍රික්කයේ බිබිල අධ්‍යාපන කලාපයට අයත් ඉගිනියාගල ඩී. එස් .සේනානායක විද්‍යාලයේ සිසුන්ගේ දෙමාපියෝ පිරිසක් ඌව පළාත් සභාවට අද(24) හිටි හැටියේ කඩා වැදුණහ.

අද ඌව ප්‍රධාන අමාත්‍ය චාමර සම්පත් දසනායක මහතාගේ මහජන දිනය වන බැවින් ඉගිනියාගල සිට කි. මී. 150 ක් පමණ දුර ගෙවා කුලියට ගත් බස් රථයිකන් ඔවුන් බදුල්ලට පැමිණ තිබේ.

එම අවස්ථාවේ එහි රැඳී සිටි ප්‍රධාන අමාත්‍යවරයා  මේ පිරිසට ප්‍රමුඛතාවය දී ඔවුන්ගේ ගැටලුවලට සවන් දුන්නේය.  
එම විද්‍යාලයේ වසරකට වැඩි කාලයක සිට විදුහල්පතිවරයෙකු නොමැතිකමින් විදුහල පරිහානියට පත්ව තිබෙන බව දෙමාපියෝ පැවසුහ .

මේ ගැටලුව මීට පෙර යොමු කළ අවස්ථාවේ දී ප්‍රධාන අමාත්‍යවරයාගේ උපදෙස් මත 2017 ජනවාරි මස සිට විදුහල්පතිවරයෙකු පත් කළත් මේ දක්වා ඔහු වැඩ බාරගෙන නැතැයි ඔවුහු අවධාරණය කළහ. වෙනත් විදුහල්පතිවරයෙක් නොමැති නම්  ප්‍රථමික අංශයේ  අංශ ප්‍රධානී ගුරුවරයා විදුහල්පති ලෙස පත් කරන ලෙස ඔවුහු ඉල්ලා සිටියහ .