සටහන සහ ඡායාරූප - ක.ග කරුණාරත්න
 
මාදුරු ඔය ජාතික වනෝද්‍යාණයේ මහඔය ප්‍රදේශයේ සිදුකළ මහාපරිමාණ තේක්ක දැව ජාවාරමකට සම්බන්ධ බවට සැක කෙරෙන පුද්ගලයෝ 05 දෙනෙකු සමඟ රුපියල් ලක්ෂ 20 ක් පමණ වටිනා තේක්ක දැව කඳන් 200 කට අධික තොගයක් අද(09) අලුයම 1.00 ට පමණ අත්අඩංගුවට ගත් බව වනජීවී නිලධාරීහු කියති.


දැව කඳන් ප්‍රවාහනය කිරීම සඳහා මොවුන් විසින් රැගෙන විත් තිබූ බව කියන ලොරියක් වනජීවී නිලධාරීන් එම ස්ථානය වටලන විට පලා ගොස් තිබේ.


මාදුරුඔය ජාතික වනෝද්‍යානයට අයත් මහඔය කොට්ටුගස්වල කොටසේ පිහිටි මෙම තේක්ක ගස් කපා ප්‍රවාහනය කිරීම සැකකරුවන් විසින් දීර්ඝ කාලයක් තිස්සේ ඉතාමත් රහසිගතව සිදුකොට ඇති බව විමර්ශනවලදී හෙළිවූ බව වනජීවී නිලධාරීහු කියති.


අත්අඩංගුවට පත් සැකකරුවන් මහඔය ප්‍රදේශයේ පදිංචිකරුවන් බවද අනාවරණය වී ඇත.
මෙම දැව ජාවාරමට ඇතැම් වනජීවී නිලධාරීන්ගේ සහ ආරක්ෂාක අංශවල සහය ලැබී තිබෙන බවට තොරතුරු ලැබී ඇතැයිද ඒ පිළිබඳව සොයා බලන බවද විමර්ශන කටයුතු සිදුකරන වනජීවී නිලධාරීහු සඳහන් කළහ.