(අනීෂා මානගේ)

දිවයින පුරා විවිධ ප්‍රදේශවල අපරාධ ගණනාවකට සම්බන්ධ බව කියන අපරාධකරුවකු ටී.56 වර්ගයේ පතුරොම් යොදන මෙරට නිෂ්පාදිත ගිනිඅවියක්, ජීවපතුරමක්, හෙරොයින්, සහ මන්නා පිහියක් සමඟ අද (11) මිද්දෙණිය ජූලම්පිටිය ප්‍රදේශයේදී අත්අඩංගුවට ගත්බව තංගල්ල කොට්ඨාස අපරාධ විමර්ශන ඒකකයේ නිලධාරිහු කියති.

මෙලෙස අත්අඩංගුවට පත්ව ඇත්තේ ලියාපදිංචි අපරාධකාරයකු වන 35 හැවිරිදි “තැඹිලි අජිත්” නම් අන්වර්ථ නාමයකින් ප්‍රසිද්ධ මිද්දෙණිය ප්‍රදේශයේ පදිංචිකරුවකු බව පොලිසිය කියයි.

ඇඹිලිපිටිය, ගම්පහ, කහවත්ත, තංගල්ල, වලස්මුල්ල, වීරකැටිය, ඇතුළු දිවයින පුරා විවිධ ප්‍රදේශවල මිනීමැරීමට තැත්කිරීම්, ගෙවල් බිඳුම්, මංකොල්ලකෑම් ආදී අපරාධ 26 කට අධික සංඛ්‍යාවක් සම්බන්ධයෙන් මෙම පුද්ගලයා සැකකරුවකු වන බව පොලිසිය කියයි.

සැකකරු සමඟ ටී.56 වර්ගයේ පතුරොම් යොදන මෙරට නිෂ්පාදිත ගිනිඅවියක් , ටී.56 වර්ගයේ ජීව පතුරොමක්, අඟල් 18 ½ ක් දිග සහ අඟල් 2 ක් පළල තලය සහිත මන්නා පිහියක්, හෙරොයින් මත්කුඩු ග්‍රෑම් 1ක් සහ මිලිග්‍රෑම් 850ක්, මුදලින් රුපියල් පහළොස්දහස් නවසීයක් , ජංගම දුරකතනයක් පොලිස් බාරයට ගෙන තිබිණි.

මෙම සැකකරු අත්අඩංගුවට ගැනීමට යන පොලිස් නිලධාරීන්ට සැකකරු සතුව තිබෙන මන්නා පිහියෙන් පහරදීමට කිහිප වාරයක්ම උත්සාහ කර ඇතැයිද එම අවස්ථාවන්හිදී සැකකරු පලාගොස් ඇතැයිද පොලිසිය කියයි.