මුඛය යනු මිනිස් සිරුරේ ප්‍රධාන අවයවයකි. නිරෝගී මුඛ සෞඛ්‍යයක් පවත්වා ගැනීම පුද්ගල පෞර්ෂත්වය වැඩි දියුණු කරන සාධකයකි. මුඛයේ දුර්ගන්ධයක් දැනෙනවානම් ඔබ බාහිරව කෙතරම් ප්‍රියමනාප වුවද වැඩක් නැත. මුඛ සෞඛ්‍යය රැක ගැනීමෙහිලා නිවැරැදිව දත් මැදීම කළ යුතුම දෙයකි. අප ගන්නා ආහාරවල කුඩා කොටස් දත් අතර රැඳී තිබියදී විවිධාකාර බැක්ටීරියා සෑදී ඇතිවන සල්ෆ සංයෝගය හේතුවෙන් මුඛ දුර්ගන්ධය හට ගනී.

මේ තත්ත්වය වලක්වා ගත හැකි ක්‍රම

උදේ සවස දෙවතාවක් දත් මදින්න.

දත්වල කුහර ඇත්නම් ඒ තත්ත්ව වලක්වා ගන්න

විදුරුමස් රෝග පවතී නම් ඒවාද වලක්වා ගන්න

අඩුම තරමින් වසරකට දෙවතාවක්වත් දන්ත වෛද්‍යවරයකු මුණ ගැසී මුඛය හොඳින් පරීක්ෂා කර ගන්න. එවිට වෛද්‍ය උපදෙස් මත ඔබට ප්‍රති බැක්ටීරියාකාරකයක් හෝ මුඛ සේදුම්කාරකයක් ඔබට ලබා ගත හැකියි.

ඔබ භාවිත කරන දත් බුරුසුව කෙසේ විය යුතුද?

මෘදු කෙඳි සහිත අලුත් දත් බුරුසුවක් විය යුතුය. කෙඳී ගැලවීගිය පරණ බුරුසු භාවිතය සුදුසු නොවේ.

සීනි, කෝපි පානය, බීම වර්ග, පැණි රස ආහාර නිරන්තරයෙන් මුඛයේ දිගු වේලාවක් තබා ගැනීමත් ,නිතරම ආහාරයට ගැනීමත් සුදුසු නැත. එසේම ඇල්කොහොල්, දුම්පානයද ඉතාම අහිතකර වේ. මෙමගින් මුඛයේ දැඩි දුර්ගන්ධයක් ඇති කරයි.

දත් සේම දිවද හොඳින් පිරිසුදු කිරීමටත් මතක තබා ගන්න.

දත් වගේම දිවෙහි රැඳී ඇති මැලියම් ඉවත් වන තුරුම දිව හොඳින් මැද ගත යුතුයි.

තවද මුඛයේ ඇති දුර්ගන්ධයට පිළියමක් ලෙස නිරතුරු චුවින්ගම් හැපීමද අත්හළ යුතු වැරැදි පුරුද්දකි.

මුඛයේ දැඩි දුර්ගන්ධය දිගින් දිගටම පවතී නම් දන්ත වෛද්‍ය උපදෙස් සඳහා වහාම යොමු වන්න.

-සටහන- මාධවී ධර්මරත්න