ISO 9001:2015 ජාත්‍යන්තර තත්ව සහතිකය ලැබූ Thimark Technocreations  පෞද්ගලික සමාගම කෙන්යාවේ National Power Company (KenGen)  සමග අමෙරිකානු ඩොලර් 156,000ක ව්‍යාපෘතියක් සඳහා ගිවිසුම් ගත වේ. මෙය ශ්‍රී ලාංකික ඉංජිනේරු සේවා සැපැයුම් ක්ෂේත්‍රයේ සුවිශේෂ සන්ධිස්ථානයකි. මේ යටතේ Thimark Technocreations සමාගම KenGen සමාගම වෙනුවෙන් KILGHARRAH 600  නමින් හඳුන්වන එක් ස්ථානයක සිට තවත් ස්ථානයකට රැගෙන යා හැකි Hydraulic Trash Rack Cleaning  යන්ත්‍රයක් සැලසුම් කිරීම, නිෂ්පාදනය, ප්‍රවාහනය, ස්ථාපනය, සහ ක්‍රියාත්මක කිරීම සිදු කිරීමට නියමිතය. 
ඊට අදාළ සෑම ක්‍රියාවලියක්ම ජාත්‍යන්තර ප්‍රමිති අනුව සිදු කෙරේ. ගෝලීය වශයෙන් පිළිගත් විදුලි යාන්ත්‍රික සහ ස්වයංක්‍රියකරණ ඉංජිනේරු විසඳුම් සැපැයීමට Thimark Technocreations  සතු හැකියාව මෙමගින් තහවුරු වේ. එවැනි යන්ත්‍රයක් ශ්‍රී ලංකාව තුළ සැලසුම් කළ සහ නිෂ්පාදනය කළ පළමු අවස්ථාව මෙය වීම සුවිශේෂ වේ.
“මෙම ව්‍යාපෘතිය දිනා ගැනීමට හැකි වීම Thimark Technocreations  අප පමණක් ලැබූ ජයග්‍රහණයක් නොවෙයි. එය ශ්‍රී ලාංකික ඉංජිනේරු විශිෂ්ටත්වය ගෝලීය මට්ටමින් විදහා දක්වන්න ලැබුණු වටිනා අවස්ථාවක්. ජාත්‍යන්තර ප්‍රමිතිවලට අනුකූලව ඉහළ වටිනාකමක් සහිත ඉංජිනේරු විසඳුම් සැලසුම් කිරීමට සහ නිෂ්පාදනය කිරීමට ශ්‍රී ලාංකික සමාගම්වලට හැකියාව තිබෙන බව මේ තුළින් තහවුරු වෙනවා.” Thimark Technocreations  ප්‍රධාන විධායක නිලධාරී හා කළමනාකරණ අධ්‍යක්ෂ තරංග මාරසිංහ පැවැසීය. 
Steel Fabrication  සේවා සපයන සමාගමක් ලෙස ආරම්භ වූ Thimark Technocreations  වර්තමානයේදී කාර්මික යන්ත්‍රෝපකරණ හා ජල ක්ෂේත්‍ර විසඳුම්වල (Sludge Scrapers, Trash Cleaners, Sluice Gates) සිට DPMC (Bajaj), Senaro, Dyno, NWOW, Lencar, Ranomoto  වැනි වාහන එකලස් කිරීමේ සන්නාම සඳහා අවශ්‍ය උපාංග නිෂ්පාදනය දක්වා ව්‍යාපාරය පුළුල් කර ඇත. කෙන්යානු ව්‍යාපෘතිය දිනා ගැනීමෙන් නිර්මාණකරණ, ස්වයංක්‍රියකරණ, FEM විශ්ලේෂණ මෘදුකාංග යොදා ගනිමින් සිදු කරන ව්‍යුහාත්මක වලංගුකරණ වැනි අංශවලට අදාළව ඔවුන් සතු විශේෂඥතාව තහවුරු වේ. අප්‍රිකානු කලාපයේ කැපී පෙනෙන රටක් වන කෙන්යාවට සේවා සැපැයීමට අවස්ථාව ලැබීමෙන් කළාපීය වෙළෙඳපොළ වෙත පිවිසීමටද හැකි වනු ඇත. 
“මේ තුළින් ගෝලීය වශයෙන් තරග කරන්න අප සතු හැකියාව පිළිබිඹු වෙනවා වාගේම ලංකාවට සැලකිය යුතු විදේශ විනිමයක් ලැබෙනවා. අපේ රටේ ඉංජිනේරු තාක්ෂණය පිළිබඳව ගෝලීය වශයෙන් ඇති පිළිගැනීම ඉහළ නංවන්නටත්, නව්‍යකරණය ප්‍රවර්ධනය කරන්නටත් අපට හැකි වෙනවා.” තරංග මාරසිංහ වැඩි දුරටත් පැවැසීය. Thimark Technocreations  ඉදිරියේදී දේශීය මෙන්ම ජාත්‍යන්තර වෙළෙඳපොළට මගී වාහන සංවර්ධන සහ නව්‍ය නිෂ්පාදන විසඳුම් සේවා සපයමින් ව්‍යාපාරය පුළුල් කිරීමට සැලසුම් කර ඇත. මෙරට අනාගත කාර්මික වර්ධනය ඇති කිරීම සඳහා විප්ලවීය භූමිකාවක් ඉටු කිරීම එම සමාගමේ ප්‍රධාන අරමුණයි.