ගනුදෙනුකරුවන්ගේ ජීවන රටාව ඔප් නංවමින්, සුඛෝපබෝගී මෝටර් රථයක හිමිකරුවකු වීමට අවස්ථාව ලබා දීමට ඒකාබද්ධ ප්‍රවර්ධන වැඩසටහනක් හරහා මහින්ද්‍රා XUV 3XO මෝටර් රථය ප්‍රවර්ධනය කිරීමට කොමර්ෂල් බැංකුව සහ අයිඩියල් මෝටර්ස් (පුද්ගලික) සමාගම උපායමාර්ගික හවුල්කාරීත්වයකට එළැඹ තිබේ.
මෙම සහයෝගීතාව යටතේ, කොමර්ෂල් බැංකුව මගින් මහින්ද්‍රා XUV 3XO වාහන මිලදී ගන්නා ගනුදෙනුකරුවන්ට වාහනයේ මිලෙන් කොටසක් සඳහා ලීසිං පහසුකම් සමඟ ඔවුන්ට අවැසි ආකාරයේ පොලී අනුපාත, ලේඛන ගාස්තු සඳහා සහන මෙන් ම පළමු වසරේ වාර්ෂික ගාස්තුව නිදහස් කර නොමිලේ ක්‍රෙඩිට් කාඩ්පතක් ද ලබා දෙනු ඇත. දිවයින පුරා පිහිටි කොමර්ෂල් බැංකු ශාඛා ජාලය හරහා මෙම පහසුකම් ලබාගත හැක.
බැංකුවේ මූල්‍ය පහසුකම් හා දීමනාවලට අමතරව අයිඩියල් මෝටර්ස් (පුද්) සමාගම වෙතින් ද වාහනය සඳහා විශේෂ වට්ටම්, නොමිලේ ලියාපදිංචිය, අමතර කොටස් සඳහා සියයට 10 ක වට්ටමක් ලබා දෙන අතර ම ශ්‍රම ගාස්තු රහිත සේවා වාර තුනක් ලබා දෙයි.
මෙම ප්‍රවර්ධන වැඩසටහන 2027 පෙබරවාරි 28 වන දින දක්වා පැවැත්වෙන අතර, ඒ හරහා ගනුදෙනුකරුවන්ට ඔවුන්ගේ මිලදී ගැනීම් සැලසුම් කිරීමට මෙන්ම ඔවුන්ගේ තනි පුද්ගල ආදායම් රටාවලට අනුව ආපසු ගෙවීම් ක්‍රම ව්‍යුහගත කර ගැනීමට ද නම්‍යශීලී බවක් ලබා දේ. මෙම ලීසිං පැකේජ සැලසුම් කර ඇත්තේ මූල්‍ය පහසුකම් ලබා දීම සහ හිමිකාරීත්වය ලබා දීම ආශ්‍රිත සේවාවලදී විශේෂ පොලී අනුපාත හා පිරිවැය සහන හරහා ප්‍රතිලාභ ලබා ගැනීමට ගනුදෙනුකරුවන්ට ඉඩ සලසා දෙමින් දැරිය හැකි මට්ටමේ වාරිකයක් ලබා දීම සඳහාය.
නවමු පාරිභෝගික කේන්ද්‍රීය ලීසිං විසඳුම් ලබා දීමේ පුරෝගාමියකු ලෙස කොමර්ෂල් බැංකුව සැමවිට ම අගය වැඩි කළ දීමනා ලබා දීම සඳහා කීර්තිමත් සමාගම් සමග සහයෝගයෙන් කටයුතු කරයි. බැංකුවේ පැරණි සහ නව ගනුදෙනුකරුවන් සියලු දෙනාට ම නව වාහනයක හිමිකරුවකු වීමේ ඔවුන්ගේ අභිලාශයට සහය වන ආකාරයේ ආකර්ෂණීය ලීසිං විකල්ප ලබා දීමට බැංකුව දක්වන කැපවීම, අයිඩියල් මෝටර්ස් සමග ඇති මෙම හවුල්කාරීත්වය හරහා මනාව පිළිබිඹු වන බව බැංකුව පැවසීය.
ඇමරිකානු ඩොලර් බිලියන 1 ඉක්මවන වෙළෙඳපොළ ප්‍රාග්ධනීකරණයක් සහිත පළමු ශ්‍රී ලාංකික බැංකුව කොමර්ෂල් බැංකුව වන අතර, ලොව හොඳම බැංකු 1000 අතරට ඇතුළත් වූ පළමු බැංකුව ද වේ. ශ්‍රී ලංකාවේ සියලු‍ම බැංකු අතරින් ඉහළම ප්‍රාග්ධන පදනමක් ඇති කොමර්ෂල් බැංකුව, ශ්‍රී ලංකාවේ පුද්ගලික අංශයේ විශාලතම ණය දෙන්නා සහ රටේ කුඩා හා මධ්‍ය පරිමාණ ව්‍යාපාර අංශයට විශාලතම ණය දෙන්නා වේ.