• 2023 වසරට සාපේක්ෂව සියයට 12.6ක වැඩිවීමක්
• 2024 වසරේ අරමුදලේ සමස්ත ආයෝජන ආදායම රු. බි. 513.8ක්
• 2023 දී රු. බි. 3ක් වූ ලාභාංශ ආදායම 2024දී රු. බි. 5.5ක් දක්වා සියයට 82.9කින් ඉහළට

භානුක අමරසිංහ 

2024 වසර අවසන් වන විට සේවක අර්ථ සාධක අරමුදලේ ශුද්ධ වටිනාකම රුපියල් බිලියන 4,375.7ක් වූ බව මහ බැංකුව පවසයි. ඒ අනුව මෙය 2023 වසර අවසානයේදී වාර්තා කළ රුපියල් බිලියන 3,886.7ට සාපේක්ෂව සියයට 12.6ක වැඩිවීමකි. 

මහ බැංකුව පසුගියදා නිකුත් කළ වාර්ෂික ආර්ථික විවරණය 2024 තුළ මෙම කරුණු ඇතුළත්ව තිබේ.  විශේෂයෙන්ම 2024 වසරේදී එම අරමුදල ආයෝජන කිරීමෙන් උපයන ලද ආදායම සහ ශුද්ධ දායක මුදල් ලැබීම් මෙම වර්ධනය සඳහා හේතු වී ඇතැයි මහ බැංකුව සඳහන් කරයි. 

ඒ අනුව 2024 වසර තුළ අරමුදලේ සමස්ත ආයෝජන ආදායම රුපියල් බිලියන 513.8ක් වූ අතර, එය පෙර වසරේ වාර්තා කළ රුපියල් බිලියන 481.1 හා සැසඳීමේදී සියයට 6.8ක වර්ධනයකි.  එසේම පොලී ආදායම, අරමුදලේ ප්‍රධාන ආදායම් ප්‍රභවයක් ලෙස 2023 වසරට සාපේක්ෂව සියයට 2.9ක වර්ධනයක් පෙන්නුම් කරමින් 2024 වසරෙදී රුපියල් බිලියන 442.4ක් රැස් කරගෙන තිබේ. 

මීට අමතරව 2023 දී රුපියල් බිලියන 3ක් වූ ලාභාංශ ආදායම 2024 වසරේ රුපියල් බිලියන 5.5ක් දක්වා සියයට 82.9කින් ඉහළ ගොස් ඇත. 

“ආයෝජන ආදායම වැඩිවීම හේතුවෙන් 2024දී අරමුදලේ බදු වියදමද රුපියල් බිලියන 64.1ක් දක්වා ඉහළ ගොස් තිබේ’’ මහ බැංකුව පවසයි. 

මේ අතර 2024 වසර සඳහා වන මුළු දායක ලැබීම් රුපියල් බිලියන 234.4ක් දක්වා සියයට 11.3 කින් ඉහළ ගොස් තිබේ. කෙසේ වෙතත් එම වසරේදී සාමාජිකයන්ට සහ ඔවුන්ගේ නෛතික උරුමක්කරුවන්ට ගෙවන ලද සමස්ත ප්‍රතිලාභ ප්‍රමාණය රුපියල් බිලියන 188.1ක් දක්වා සියයට 12.9කින් අඩුවී තිබේ. 

මීට සමගාමීව මෙම කාලය තුළ සාමාජිකයන් වෙත වූ මුළු වගකීම් රුපියල් බිලියන 4,289ක් ලෙස සටහන්ව ඇති අතර, එය 2023දී පැවැති රුපියල් බිලියන 3,817 හා සැසඳීමේදී සියයට 12.4ක වැඩවීමකි. 

2024 වසර අවසන් වන විට සේවක අර්ථසාධක අරමුදල සතු සමස්ත ගිණුම් සංඛ්‍යාව මිලියන 21.5 කි.