භානුක අමරසිංහ 

මෙරට ප්‍රමුඛතම ඇඟලු‍ම් නිෂ්පාදන සමාගම් සමූහයක් වන හෙළ ඇපරල් හෝල්ඩින්ග්ස් පීඑල්සී, සිය පරිපාලිත සමාගම් දෙකක පූර්ණ හිමිකාරීත්වය සිංගප්පූරු සමාගමක් වෙත අලෙවි කිරීම සඳහා වන එකඟතාවට පිවිසීම පසුගිය ජූනි 06 වැනිදා සිදුකළ බව පවසයි. 
සමාගමේ ගෝලීය නිෂ්පාදන මෙහෙයුම් සම්බන්ධයෙන් වර්තමානයේදී සිදු කරන උපායමාර්ග ප්‍රතිසංස්කරණ යටතේ මෙම අලෙවිය සිදුකළ බව සමාගමේ අදහස වී තිබේ. විශේෂයෙන්ම සරල ව්‍යුහාත්මක සැකැස්මක් යටතේ සමූහයේ කාර්යසාධනය ඉහළ දැමීමේ අරමුණ ද ඊට හේතුව වී ඇත. 
“ඉදිරි මූල්‍ය වර්ෂවලදී අපගේ මෙහෙයුම් ආරක්ෂා කරගැනීම සහ දිගුකාලීන තරගකාරිත්වය දියුණු කරගැනීමත් අරමුණක්.” යනුවෙන් සමූහය පවසයි. පසුගියදා කොළඹ කොටස් හුවමාරුව වෙත ලිපියක් මගින් දැනුම් දෙමින් එම සමූහය මේ පිළිබඳව සඳහන් කර තිබේ.  ඒ අනුව සමූහයට අයත් හෙළ ක්ලෝතින් (ප්‍රයිවට්) ලිමිටඩ් සමාගමේ පූර්ණ හිමිකාරීත්වය සහිත පරිපාලිත සමාගමක් වන ෆවුන්ඩේෂන් ගාර්මන්ට්ස් (ප්‍රයිවට්) ලිමිටඩ් සතුව නාරම්මල සහ මාවතගම පිහිටි නිෂ්පාදන පරිශ්‍ර දෙකක්, එහි මෙහෙයුම්, සේවකයන්, වත්කම් ඇතුළත්ව මෙලෙස සිංගප්පූරුවේ Q Collection Pte Ltd නම් සමාගමක් වෙත රුපියල් බිලියන 2.7 ක මුදලකට අලෙවි කර තිබේ. 
“මෙම Q Collection සමාගම සිංගප්පූරුවේ පිහිටි ගෝලීය ඇඟලු‍ම් සන්නාම සඳහා වඩාත් ඉහළ ගුණාත්මක බවින් යුත් ඇඟලු‍ම් නිෂ්පාදන විසඳුම් ලබාදීමේ සමාගමක්. ඉදිරියේදී එම සමාගම හා එක්ව හෙළ සමූහයේ ගෝලීය හවුල්කරුවන්ගේ ඇණවුම් සම්පූර්ණ කිරීමට කටයුතු කරනවා.” යනුවෙන් ද හෙළ ඇපරල් හෝල්ඩිංග්ස් පවසයි. 
මේ අතර, අදාළ පැවරීම ශ්‍රී ලංකා ආයෝජන මණ්ඩලයේ උපදෙස් අනුව සිදුකළ බවත් එම සමාගම සඳහන් කරයි. එහිදී පසුගිය මැයි 14 වැනිදා එම මණ්ඩලය මෙම ගනුදෙනුව සඳහා මූලික අනුමැතිය ලබා දී තිබේ.