(මොහොමඩ් ආසික්) 
 
දේශීය අපනයන බෝගවල මිල ජාත්‍යන්තර වෙළඳපොළේ පහළ යාමට හේතුව ඒවාට විවිධ දේවල් මිශ්‍ර කර අපනයනය කිරීම බව අපනයන කෘෂීකර්ම අධ්‍යක්ෂ ජනරාල් ආචාර්ය ඒ.පී. හීන්කෙන්ද මහතා කීය.
 
ශ්‍රී ලංකාවේ පළමු වරට මහනුවර වැනිලා වගා කරන්නන්ගේ සංගමය  ජපානයට වැනිලා අපනයනය කිරීම ආරම්භ කිරීමේ උත්සවයට අද (15) සහභාගී වෙමින් අපනයන කෘෂිකර්ම අධ්‍යක්ෂ ජනරාල්වරයා එසේ කිය. 
 
මහනුවර වත්තේගම රහස් ඇල්ල හෝටලයේදී මෙම උත්සවය පැවැත්විණි.
 
මහනුවර වැනිලා වගා කරන්නන්ගේ සංගමයේ සභාපති මුතුබණ්ඩාර මඩුගල්ලේ මහතාගේ මූලිකත්වයෙන් මෙම උත්සවය පැවැත්විණි.
 
ඒ සඳහා මධ්‍යම පළාත් කර්මාන්ත වාණිජ කටයුතු අමාත්‍යාංශයේ ලේකම් කුමුදු කරුණාරත්න, ශ්‍රී ලංකා මහ බැංතුවේ මාතලේ ප්‍රාදේශිය කාර්යාලයේ කළමනාකාරිණි විනීතා හේරත්, පාතදුම්බර ප්‍රාදේශීය ලේකම් ඩී.ජී. චන්ද්‍රා ජයතුංග‍ වයඹ පළාතේ හිටපු අමාත්‍ය ලක්ෂ්මන්  වේඩරුව යන මහත්ම මහත්මීන් සමඟ වැනිලා මිළ දී ගනු ලබන ජපන් නියෝජිත පිරිසක් ද එක්ව සිටියහ.  
 
මහනුවර වැනිලා වගාකරන්නන්ගේ සංගමය මගින් දිවයින පුරා වගා කරනු ලබන ගුණාත්මක බවින්  ඉහළ වැනිලා අපනයනය කිරීම සඳහා වන ගිවිසුමට ජපන්  නියෝජිතයින් සහ සංගමයේ නියෝජිතයින් අතර අත්සන් තැබීම  මෙහිදී සිදු කෙරිණි.