රජ්‍ය ව්‍යවසාය මූල්‍ය වාර්තා යහපත්ව පවත්වාගෙන නොයෑම ලැයිස්තුගතවීමට බාධාවක්ලු‍

භානුක අමරසිංහ

රජ්‍ය ව්‍යවසාය (SOE) කොළඹ කොටස් වෙළෙඳ පොළේ ලැයිස්තුගත කිරීම සඳහා වෙනමම පුවරුවක් හඳුන්වා දී තිබුණද, එම ව්‍යවසාය මෙතෙක් ඊට නිසි ප්‍රතිචාර දක්වා නොමැති බව කොටස් වෙළෙඳ පොළ සභාපති ඩිල්ෂාන් වීරසේකර මහතා පවසයි.
ඒ අනුව අදාළ සුදුසු ව්‍යවසාය මෙම පුවරුවේ ලැයිස්තුගවීම සඳහා ඉදිරිපත් වන තෙක් තමන් බලා සිටින බවත්, ඊට අවශ්‍යව ඇත්තේ රජයේ මුලපිරීම බවත් ඔහු වැඩිදුරටත් සඳහන් කළේය.
කොළඹ කොටස් වෙළෙඳ පොළ මගින් මෙම මාසයේ කොළඹදී පවත්වන Invest Sri Lanka  2025 ආයෝජන සමුළුව ගැන දැනුවත් කිරීමේ මාධ්‍ය හමුවේදී සභාපතිවරයා මෙම කරුණු අනාවරණය කළේය.
ඒ අනුව මෙම SOE  පුවරුව තුළ රාජ්‍ය බැංකු, තෙල් සංස්ථාව, විදුලිබල මණ්ඩලය වැනි ඕනෑම රාජ්‍ය ව්‍යවසායක් ලැයිස්තුගත කිරීම සිදු කළ හැකි බවත්, ඒ සඳහා අවශ්‍ය ක්‍රියාරාමුව මේ වන විට සකස් කර තිබෙන බවත් සභාපතිවරයා සඳහන් කළේය. කොළඹ කොටස් වෙළෙඳපොළේ ස්ථාපිත කෙරුණු මෙම SOE  පුවරුව වෙත එහි නියාමකයා වන ශ්‍රී ලංකා සුරැකුම්පත් හා විනිමය කොමිෂන් සභාවේ අනුමැතිය හිමි වූයේ 2023 වසරේදීය. එතැන් පටන් මෙම පුවරුව රාජ්‍ය ව්‍යවසාය සඳහා විවෘතව පවතී.
කෙසේ වෙතත් ඇතැම් රාජ්‍ය ව්‍යවසාය ලැයිස්තුගත සමාගම් මගින් අනුගමනය කරන සාම්ප්‍රදායික පිළිවෙත් අනුගමනය කිරීමට අපොහොසත්වීම මෙම ලැයිස්තුගතවීම් ප්‍රමාදවීමට හේතුවක් බවත් ඔහු පෙන්වා දෙයි.
“ඇතැම් රාජ්‍ය ව්‍යවසාය මූල්‍ය වාර්තා සැකසීමේ දී හා වාර්තා කිරීමේ දී කොටස් වෙළෙඳපොළ පිළිගත් සම්මතයන් අනුගමනය කරලා නැහැ. මෙම සම්මතයන් සමාගමක් ලැයිස්තුගත කිරීමේ දී අනුගමනය කරන සාමාන්‍ය සම්ප්‍රදායක්. එහෙත් ඒ සඳහා යම් කාලයක් ලබා දෙන්න අපි සූදානම්.” යැයිද ඒ මහතා කීය.