සෙලාන් බැංකුව, අඛණ්ඩව 13 වැනි වරටත් තේමා සහ නිල බැංකු සහකරු (Title and Official Banking Partner) ලෙස කටයුතු කළ ‘කැදැල්ල’ ඉදිකිරීම් ප්‍රදර්ශනය පසුගියදා සාර්ථකව අවසන් විය. මෙම ප්‍රදර්ශනය 2025 මාර්තු 28 සිට මාර්තු 30 දක්වා කොළඹ සිරිමාවෝ බණ්ඩාරනායක අනුස්මරණ ප්‍රදර්ශන මධ්‍යස්ථානයේදී පැවැත්විණි. Asia Exhibition and Conventions මගින් සංවිධානය කරන ලද මෙම ප්‍රදර්ශනයේදී නරඹන්නන්ට නිවාස ඉදිකිරීම හා අලංකරණය සම්බන්ධ නිෂ්පාදන හා සේවා රාශියක් දැකබලා ගැනීමට අවස්ථාව හිමි විය. 

මෙහි ප්‍රදර්ශන කුටි අතරට සෙලාන් බැංකුවේ ප්‍රදර්ශන කුටියක්ද ඇතුළත් වූ අතර, ඒ හරහා නිවාස හිමිකරුවන්ට, ගැනුම්කරුවන්ට සහ දේපළ වෙළඳාම් ක්ෂේත්‍රයට වැදගත් වන නිවාස ණය පෞද්ගලික ණය, ලීසිං පහසුකම්, ක්‍රෙඩිට් කාඩ්පත්, ජංගම ගිණුම් සහ ඉතුරුම් ගිණුම් මෙන්ම ආයෝජන සේවා ඇතුළු සේවා රැසක් පිරිනැමීමට සෙලාන් බැංකුව කටයුතු කළේය. 

කැදැල්ල ප්‍රදර්ශනයේ සෙලාන් බැංකු කුටියේ විශේෂත්වය වූයේ එහි සිටි නිවාස ණය විශේෂඥයන් විසින් නරඹන්නන් වෙත ලබා දුන් සේවයයි. ආකර්ෂණීය පොලී අනුපාත යටතේ සෙලාන් නිවාස ණය සහ පෞද්ගලික ණය සඳහා අයදුම් කිරීමට අවශ්‍ය සහය ලබාදීමට අමතරව එම ක්‍රියාවලිය පුරාම ඔවුන්ට අවශ්‍ය දැනුවත් කිරීම් හා මගපෙන්වීම් කිරීමටද මෙම නිවාස ණය විශේෂඥයෝ කටයුතු කළහ. මෙම සුවිශේෂී සේවාව හේතුවෙන් ණය පහසුකම් ලබාගැනීමේදී වරින් වර බැංකුවේ විවිධ අංශවල නිලධාරීන් හමුවීමට යාමෙන් තොරව, වඩාත් ඉක්මනින් තම අවශ්‍යතාව ඉටු කර ගැනීමට ගනුදෙනුකරුවන්ට අවස්ථාව හිමි විය. 

එමෙන්ම වැඩි වන විදුලි බිලට විසඳුමක් වශයෙන් සෙලාන් සූර්ය බලශක්ති ණය පහසුකම් සඳහා අයදුම් කිරීමටද කැදැල්ල ප්‍රදර්ශනය නරඹන්නන්ට අවස්ථාව හිමි විය. මේ සඳහා සෙලාන් බැංකුව විසින් රටේ ප්‍රමුඛ පෙළේ සූර්ය බලශක්ති සමාගම් 35 කට අධික සංඛ්‍යාවක් සමග අත්වැල් බැඳගෙන, සහනදායී පොලී අනුපාත යටතේ සූර්ය බලශක්ති ණය පහසුකම් පිරිනමන ලදී.