භානුක අමරසිංහ

2025 වසරේ ජනවාරි මාසයේ සිට පෙබරවාරි මාසය දක්වා මුල් මාස දෙක තුළ මෙරට සීනි නිෂ්පාදනය මෙට්‍රික් ටොන් 2,702 ක් ලෙස සටහන්ව තිබේ. මහ බැංකුව නිකුත් කළ නවතම කෘෂිකාර්මික දත්ත වාර්තාවේ මේ පිළිබඳව සඳහන් වෙයි. ඒ අනුව මෙය 2024 වසරේ මුල් මාස දෙකේදී සිදුකළ මෙට්‍රික් ටොන් 5,599 ක සීනි නිෂ්පාදනය හා සැසඳීමේදී අඩකින් පමණ අඩුවීමකි. මෙරට සීනි නිෂ්පාදන සමාගම් මගින් නිකුත් කළ දත්ත අනුව මෙම වාර්තාව සකස් කර තිබේ. 
මේ අතර 2025 වසරේ මුල් මාස තුනේදී මෙරටට ආනයනය කළ සීනි ප්‍රමාණය මෙට්‍රික් ටොන් 218,623 ක් බව මෙම වාර්තාව සඳහන් කරයි. ශ්‍රී ලංකා රේගුවේ දත්ත අනුව මෙය ඉදිරිපත් කර තිබේ. කෙසේ වෙතත් මෙය 2024 වසරේ මුල් මාස තුනේදී මෙරටට ආනයනය කළ මෙට්‍රික් ටොන් 121,772 ක් පමණ වන සීනි ප්‍රමාණය හා සැසඳීමේදී දෙගුණයකට ආසන්න ඉහළ යාමකි. 
මෙම දත්ත අනුව පසුගිය වසරේ නොවැම්බර් මාසයේ සිට මෙරට සිදුකළ සීනි ආනයනයේ කැපී පෙනෙන වර්ධනයක් දැකගත හැකි බව මහ බැංකුව පවසයි.
මේ අතර ජාත්‍යන්තර වෙළෙඳපොළෙහි සීනි මිල මේ වසරේ මාර්තු මාසයේදී සුළු වශයෙන් පහළ ගොස් ඇති අතර, ගෝලීය ඉල්ලු‍මේ පැවැති දුර්වලතා ඊට හේතුව වී තිබේ. 2024 වසර තුළ මෙරට සමස්ත සීනි නිෂ්පාදනය මෙට්‍රික් ටොන් 80,102 ක් ලෙස සටහන්ව තිබේ. එසේම 2024 වසරේදී මෙරටට සීනි මෙට්‍රික් ටොන් 582,906 ක් ආනයනය කර තිබේ. 2023 දී එය මෙට්‍රික් ටොන් 652,876 ක් විය. 2023 වසරේ මෙරට සමස්ත සීනි නිෂ්පාදනය මෙට්‍රික් ටොන් 66,177 කි.