භානුක අමරසිංහ 

ජාත්‍යන්තර ව්‍යාපාරික සඟරාවක් වන Forbes සඟරාව මගින් වාර්ෂිකව ඉදිරිපත් කරන Forbes 30 Under 30 පිළිගැනීම යටතේ ආසියානු කලාපය සඳහා ඉදිරිපත් කළ Forbes 30 Under 30 Asia 2025  ලැයිස්තුවට ඇතුළුවීමට ශ්‍රී ලාංකික තරුණයන් තිදෙනෙක් සමත්ව සිටිති. 
ආසියා -පැසිපික් කලාපය තුළ අවුරුදු 30ට අඩු වයසේදී විවිධ අංශ තුළ දක්ෂතා දැක්වූ 300 දෙනකු ඇගයීම වෙනුවෙන් මෙම ලැයිස්තුව සකස් කරයි. 
ඒ අනුව Forbes 30 Under 30 Asia 2025 හි සමාජමාධ්‍ය, අලෙවිකරණය සහ දැන්වීම්කරණ අංශය යටතේ නිකින් මාතරආරච්චි නම් කෙරී තිබේ. ඔහු Synapse AI Labs හි නිර්මාතෘවරයා වෙයි. ඉන් නිර්මාණය කළ Kommon Poll  වැඩසටහන කෘත්‍රිම බුද්ධියෙන් බලගැන්වුණු සමාජ ඇහුම්කම්දීමේ ටූලයකි. 
එසේම සිල්ලර සහ ඉ-වාණිජ අංශය යටතේ යානිකා අමරසේකර - සියගුණ නම් කෙරී තිබේ. ඇය ශ්‍රී ලංකාවේ විවාහ මංගල්‍යය අවස්ථා හා සම්බන්ධ පළමු අන්තර්ජාල ඉ-වාණිජ වේදිකාව වන Silver Aisle හි නිර්මාතෘවරයයි. ඇය මේ වනවිට එල්බී ෆිනෑන්ස් සමාගමේ ස්වාධීන අධ්‍යක්ෂවරියකද වෙයි. ඇය සම්පත් බැංකුවේ හිටපු සභාපතිවරයකු වන හර්ෂ අමරසේකර මහතාගේ දියණියයි. 
මීට අමතරව කලා සහ විලාසිතා, ආහාර සහ පාන අංශය යටතේ චරිත් එන් සිල්වා නම් කෙරී තිබේ. සුප්‍රසිද්ධ ඉවුම්පිහුම් යූටියුබ් නාලිකාවක් වන Wild Cookbook හි නිර්මාතෘවරයා වෙයි. එම නාලිකාව සතුව අද වනවිට මිලියන 10කට අධික සබ්ස්ක්‍රයිබර්වරුන් ගණනක් සිටියි. එසේම ඔහු පසුගිය වසරේ නොවැම්බර් මාසයේදී Wildish නමින් තමන්ගේම ආපනශාලාවක්ද විවෘත කිරිමට සමත් විය.