කොළඹ කොටස් හුවමාරුවේ දර්ශක අගයන් ඊයේ (27) දිනයේදී දරුණු කඩා වැටීමක් වාර්තා විය. ඒ අනුව සියලු‍ කොටස් මිල දර්ශකය ඒකක 22,662.09 ක් දක්වා පෙර දිනයට සාපේක්ෂව ඒකක 182.14 කින් එනම් සියයට 0.80කින් සහ ස්ටෑන්ඩර්ඞ් ඇන්ඩ් පුවර්ස් ශ්‍රී ලංකා දර්ශකය ඒකක 6,268.45ක් දක්වා පෙර දිනයට සාපේක්ෂව ඒකක 42.85 කින් එනම් සියයට 0.68කින් පහත වැටුණි. 

දිනය තුළ සමාගම් 45ක කොටස් මිල ඉහළ යාම සිදු වූ අතර, සමාගම් 183ක කොටස් මිල පහත වැටුණි. විශේෂයෙන්ම ආයෝජකයන් තුළ පවතින ලාභ ඉපැයීමේ අපේක්ෂාවන් මෙලෙස දර්ශක අගයන් පහත වැටීමට හේතුව වී තිබේ. 

එසේම දිනය අවසානයේදී සමස්ත පිරිවැටුම රුපියල් මිලියන 2,341 ක් ලෙස සටහන් වූ අතර එය පෙර දිනයේ වාර්තා වූ රුපියල් මිලියන 3,441 ක පිරිවැටුමට සාපේක්ෂව සියයට 32ක පසුබැසීමකි. එහිදී දිනය තුළදී දේශීය මිලදී ගැනීම් සහ දේශීය විකුණුම් පිළිවෙළින් සියයට 29කින් සහ සියයට 30 කින් පහත වැටී තිබේ. එසේම විදේශීය මිලදී ගැනීම් රුපියල් මිලියන 16.3ක් දක්වා සියයට 90 කින් පහත වැටී තිබේ. දිනය අවසානයේදී සමස්ත වෙළෙඳ පොළ ප්‍රාග්ධනීකරණය රුපියල් ට්‍රිලියන 8.09ක් වූ අතර, එය වසරේ මේ දක්වා සියයට 42.04ක වර්ධනයකි.