කොළඹගේ මාවත ව්‍යාපෘතියේ නිවාස ඒකක 615ක්. ටොරිංටන් මාවත නිවාස ව්‍යාපෘතියේ නිවාස ඒකක 115ක්

ඇස්තමේන්තුගත පිරිවැය රුපියල් බිලියන 7.48 ක්

නිමල කොඩිතුවක්කු

නාගරික පුනර්ජීවන ව්‍යාපෘතිය යටතේ කොළඹගේ මාවත හා ටොරිංටන් මාවත නිවාස ව්‍යාපෘති නැවත ක්‍රියාත්මක කිරීමට කැබිනට් අනුමැතිය ලැබී ඇතැයි කැබිනට් මාධ්‍ය ප්‍රකාශක, සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා පැවසීය.

නාගරික පුනර්ජීවන ව්‍යාපෘතිය යටතේ ක්‍රියාත්මක කර අතරමග නවතා තිබූ කොළඹගේ මාවත හා ටොරිංටන් මාවත යන පෙදෙස්හි ඇති නිවාස ව්‍යාපෘති දෙකෙහි මූලික කටයුතු නැවත ආරම්භ කිරීම සඳහා 2024 -12- 30 දින පැවති අමාත්‍ය මණ්ඩල රැස්වීමේදී අනුමැතිය ලබා දී ඇත.

 කොළඹගේ මාවත ව්‍යාපෘතිය නිවාස ඒකක 615 කින් සහ ටොරිංටන් මාවත නිවාස ව්‍යාපෘතිය නිවාස ඒකක 115කින් සමන්විත වේ. එම ව්‍යාපෘති ක්‍රියාත්මක කිරීම සඳහා වන ඇස්තමේන්තුගත පිරිවැය රුපියල් බිලියන 7.48 ක් වන අතර, ඉදිකිරීම් කටයුතු නිම කිරීම සඳහා වසර දෙකහමාරක පමණ කාලයක් ගතවනු ඇතැයි අපේක්ෂා කෙරේ. ඒ අනුව, එකී ව්‍යාපෘති ක්‍රියාත්මක කිරීම සඳහා අවශ්‍ය ප්‍රතිපාදන 2026 වර්ෂයේ සිට 2028 වර්ෂය දක්වා වෙන් කර ගැනීම පිණිස නාගරික සංවර්ධන, ඉදිකිරීම් සහ නිවාස අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.