භානුක අමරසිංහ 

කොළඹ කොටස් හුවමාරුවේ ලැයිස්තුගත විවිධාංගීකරණය වූ මූල්‍ය සමාගමක් වන ඔරියන්ට් ෆිනෑන්ස් පීඑල්සී සමාගම, ජනශක්ති ෆිනෑන්ස් පීඑල්සී ලෙස සිය නම වෙනස් කරන බව ප්‍රකාශ කර සිටියි. ඒ අනුව මැයි 09 වැනිදා සිට බලාත්මක වන පරිදි මෙම නම් වෙනස් කිරීම සිදු කර තිබේ. 
මෙහිදී 2007 අංක 07 දරණ සමාගම් පනතේ අටවැනි වගන්තියේ ප්‍රතිපාදනවලට අනුකූලව මෙලෙස සමාගමේ නාමය වෙනස් කළ බව ඔරියන්ට් ෆිනෑන්ස් පීඑල්සී සමාගම සඳහන් කරයි. 
ජනශක්ති සමූහයෙහි පරිපාලිත සමාගමක් වන ඔරියන්ට් ෆිනෑන්ස් පීඑල්සී සමාගමේ කොටස් හිමිකාරීත්වයෙන් 93,644,438ක් එනම් සියයට 44.36ක් හිමිව ඇත්තේ ජනශක්ති ලිමිටඞ් සමාගමටයි. එසේම තවත් කොටස් 90,000,000ක් එනම් සියයට 42.63ක් සෙලාන් බැංකුව/ජනශක්ති ලිමිටඩ් (සමපාර්ශ්වික) ගිණුමට හිමිව තිබේ. 
1981 වසරේදී ආරම්භ කෙරුණු ඔරියන්ට් ෆිනෑන්ස් පීඑල්සී සමාගම මේ වනවිට කල්බදු, ස්ථාවර තැන්පතු, රන් ණය, මෙන්ම ඉස්ලාමිය මූල්‍ය යනාදී සේවා ලබාදෙයි. පසුගිය වසර වන විට එම සමාගම සතුව ලංකාව පුරා ශාඛා 35ක සංඛ්‍යාවක් පැවතුණි.