කරන්දෙණිය – එම්. සුසිල් පියන්ත සහ පිටිගල – ඩී.ජේ. විජේසිංහ

සිය ආයතනය මෙරට පමණක් නොව දේශාන්තරවල පවා ඉමහත් ප්‍රසිද්ධියට පත් කිරීමට කාලය ශ්‍රමය වැය කරමින් කටයුතු කළ සියලු‍ම සේවක, සේවිකාවන්ට උපහාර පිදීම නිමිත්තෙන් ඔවුන් සියලු‍ දෙනාම සුවඳ මලින් නෑවූ අපූරු උපහාර උළෙලක් ඇල්පිටිය වතුරවිල එවර්ග්‍රීන් තේ කර්මාන්ත ශාලා පරිශ්‍රයේ දී පැවැත්විණ.

එවර්ග්‍රීන් තේ කර්මාන්ත ශාලා පාලන අධිකාරිය සංවිධානය කළ මේ අපූරු අවුරුදු උපහාර උළෙලේ දී එවර්ග්‍රීන් තේ කර්මාන්ත ශාලා සමූහයට අයත් තේ කර්මාන්ත ශාලා හයක සේවක, සේවිකාවෝ 1260ක් මෙදින සුවඳ මලින් නෑවූහ.

ඇල්පිටිය, වතුරවිල එවර්ග්‍රීන් තේ කර්මාන්ත ශාලා පරිශ්‍රයට එකතු වූ සියලු‍ම සේවක, සේවිකාවන්ට දිවා භෝජන සංග්‍රහයක් ලබා දී ඔවුන් වෙනුවෙන්ම සංවිධානය කළ විශේෂ සංගීත ප්‍රදර්ශනයක් ද පවත්වා මේ අපූරු උපහාරය සිදු කෙරිණ. සේවක, සේවිකාවන්ගේ දක්ෂතා අගයා ඔවුනට උපහාර තිළිණ ප්‍රදානය කිරීම ද මෙහිදී සිදු කෙරිණි.

මේ අවස්ථාව සියැසින් දැක ගැනීමට එවර්ග්‍රීන් තේ කර්මාන්ත ශාලා සමූහයේ සභාපති අනුර ද සිල්වා, උප සභාපතිවරුන් වන සෙනාල් ද සිල්වා, විනෝද් ද සිල්වා, අධ්‍යක්ෂිකා සාගරිකා ජයසිංහ සහ අධ්‍යක්ෂ තුෂාර ගීගනගේ යන මහත්ම මහත්මීහු ද සහභාගි වූහ.

එවර්ග්‍රීන් තේ කර්මාන්ත ශාලා සමූහයේ සේවිකාවක විසින් පොල්තෙල් පහන දල්වා උපහාර උත්සවය ආරම්භ කළ අයුරු හා එම ආයතනයේ සේවක, සේවිකාවන් සුවඳ මලින් නාවන අයුරු ඡායාරූපවලින් දැක්වේ.