ශ්‍රී ලංකා මහ බැංකුව සිය පදනම් පොලී අනුපාත වෙනස් කරනු ඇති බවට අදහසක් වෙළෙඳ පො​ළ තුළ තිබුණි. මහ බැංකුවේ මුල්‍ය මණ්ඩලය තීරණය කර ඇති පරිදි පසුගිය කාලයේ පවත්වාගෙන ගිය සියයට 7.5 ක පදනම් අනුපාත වෙනස් නොකිරීමට තීරණය කර ඇත. පොලී අනුපාත වෙනස් කළ හොත් එය ආර්ථිකය සක්‍රීය කරන තීන්දුවක් විය හැකිය. පුද්ගලික අංශයේ ණය ගැනීම් තව දුරටත් ඉහළ යන්නට ඉඩ තිබුණි.

 එවැනි ස්වභාවයකින් ඉල්ලුම ඉහළ යන අතර, එය පාලනය කිරීමේ දූෂ්කරතා මහ බැංකුවේ මුදල් මණ්ඩලය අවබෝධ කරගෙන ඇති බව පෙනේ. ආර්ථික වර්ධනය ඇති කිරීමේ දී කිසියම් පාලනයක් අවශ්‍ය අතර, සැපයුම සඳහා ප්‍රමාණවත් ධනය නොමැති අවස්ථාවක ඉල්ලුම ඉහළයෑම අවදානමක් බව තීරණය කර ඇති බව පෙනේ.
කෙසේ වෙතත් ශ්‍රී ලංකාවේ ආර්ථිකය හැසිරෙන ආකාරය කොටස් වෙළෙඳපොළ ආයෝජන අංශ දිරිමත් කරන බව නිරීක්ෂණය කළ හැකිය. වරින්වර සුළු පසුබෑම් තිබිය දී පවා වර්ධනයක් කරා තව දුරටත් ගමන් කරමින් සිටී. මෙම සතියේ ගෙවී ගිය දින දෙකක කාලය තුළ පසුබෑමකට පසු වර්ධනයක් තිබුණ නමුත් ඊයේ (ජුලි 23) ආරම්භයේ සිට ස්ථාවර වර්ධනයක් නිරීක්ෂණය කළ හැකි විය. රුපියල් මිලියන 231 ක කොටස් මිල දී ගන්නා අතර විකිණීම් රු. මිලියන 331 කි. මෙම සතියේ දින තුනක කාලය තුළ පමණක් රු. මිලියන 259 ක ශුද්ධ අවාසියක් රටට සිදු වී තිබේ.

පෙරේදා (ජුලි 22) කොටස් වෙළෙඳපොළ ගනුදෙනුවල දී සියලු කොටස් මිල දර්ශකය ඒකක 19,243.08 ක් දක්වා වර්ධනය විය. එය කලින් දිනයට සාපේක්ෂව දර්ශක 151.15 ක දියුණුවීමකි. එස් ඇන්ඩීපී ශ්‍රී ලංකා දර්ශකය 5,689.62 ක් වශයෙන් විය. පෙර දිනයට සාපේක්ෂව දර්ශක 32.00 ක ඉහළ යාමක් සේ වාර්තා වේ. පිරිවැටුම රු. බිලියන 6.23 ක් ලෙස සඳහන්ය. වාර්තා වූ ගනුදෙනු ප්‍රමාණය 39,042 කි. හුවමාරු වූ කොටස් ප්‍රමාණය මිලියන 253.3 ක් විය. සමාගම් 172 ක කොටස් මිල ඉහළ ගියේය. කොටස් මිල පහත වැටුණ සමාගම් ගණන 79 කි. 

ඩී.එෆ්.සී.සී. රු. මිලියන 360 ක්, සන්ෂයින් හෝල්ඩිං රු. මිලියන 230 ක්, රීල් ප්‍රොපටි රු. මිලියන 226 ක්, ජෝන් කීල්ස් හෝල්ඩිං රු. මිලියන 223 ක්, ඩොක්යාඩ් රු. මිලියන 197 ක්, එන්.ඩී.බී. රු. මිලියන 196 ක්, පෑන් ඒෂියා රු. මිලියන 157 ක්, සිංගර් ශ්‍රී ලංකා රු. මිලියන 132 ක්, බ්‍රවුන් ඉන්වෙස්ට්මන් රු. මිලියන 117 ක් ආදි වශයෙන් පිරිවැටුමට වැඩිම දායකත්වයක් දැක්විය.

නිරීක්ෂක