කර්මාන්ත හා ව්‍යවසායකත්ව සංවර්ධන අමාත්‍යංශය යටතේ දිවයිනේ දකුණ, බස්නාහිර සහ සබරගමුව පළාත් ආවරණය කරමින් සේවය කරන අපනයන සංවර්ධන නිලධාරීන් සහ කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මහතා අතර විශේෂ හමුවක් පසුගියදා අපනයන සංවර්ධන මණ්ඩලය පරිශ්‍රයේ දී පැවැත්විණ.
මෙම සාකච්ඡාවේ අරමුණු වූයේ ශ්‍රී ලංකාවේ අපනයන දිශානතිය පිළිබඳ අපනයන සංවර්ධන නිලධාරීන් දැනුවත් කිරීම, අපනයන ඉලක්ක හා ප්‍රාදේශීය සංවර්ධන උපායමාර්ග සාකච්ඡා කිරීම, සහ අපනයන සංවර්ධන මණ්ඩලයේ විවිධ අංශවල කාර්යභාරය පිළිබඳව අපනයන සංවර්ධන නිලධාරීන් පුළුල්ව දැනුවත් කිරීමයි.
මෙම හමුවට කර්මාන්ත හා ව්‍යවසායකත්ව සංවර්ධන නියෝජ්‍ය අමාත්‍ය චතුරංග අබේසිංහ, අපනයන සංවර්ධන මණ්ඩලයේ සභාපති සහ ප්‍රධාන විධායක නිලධාරී මංගල විජේසිංහ, වැඩබලන අධ්‍යක්ෂ ජනරාල් එරන්දික දිසානායක යන මහත්වරු ඇතුළු අධ්‍යක්ෂවරු, නිලධාරීහු සහ දිවයිනේ දකුණ, බස්නාහිර සහ සබරගමුව පළාත් ආවරණය කරමින් සේවය කරන අපනයන සංවර්ධන නිලධාරීහු සහභාගී වූහ.