පිලිපීනයට ඇද හැළෙන මහ වැසි හේතුවෙන් ප‍්‍රදේශ රැසක් ජලයෙන් යට වී ඇති අතර, හදිසියේ හටගත් එම ජල ගැලීම්වලට පුද්ගලයෝ 23 දෙනෙක් බිලිවූහ.
ජල ගැලීම්වලට හසුවීමෙන් 100 දෙනකු අතුරුදන් වූ අතර උන්හිටිතැන් අහිමි වූ ගණන ලක්ෂ 6 කට වැඩි යැයි පිලිපීන මාධ්‍ය වාර්තා කළේය.

ජල ගැලීම් හටගත්තේ ඉකුත් දින කිහිපය තිස්සේ නොකඩවා ඇද හැලූණු මහ වැසි හේතුවෙනි. ජල ගැලීම් වාර්තා වන්නේ පිලිපීනයේ මැනිලා අගනුවර සහ ඒ ආශ‍්‍රිත ප‍්‍රදේශවලිනි.

ජලයෙන් යටවීම නිසා මැනිලා ගුවන්තොටුපොළ වසා දැමීමටත්, ගුවන් තොටුපොළට පැමිණෙන ගුවන් යානා ආපසු හරවා යැවීමටත් බලධාරීහු පියවර ගත්හ.
පිලිපීන සිවිල් ආරක්ෂක සේවා නිලධාරීන් ප‍්‍රකාශ කළේ සහන සේවා කටයුතුවලට ද වර්ෂාවෙන් බාධා එල්ල වී ඇති බවය. සහන සේවා සඳහා පිලිපීන හමුදාවේ ද සහාය හිමි වන බව පිලිපීන රජය වැඩි දුරටත් කියා සිටියේය.

සහන සේවා කටයුතු විධිමත්ව කි‍්‍රයාත්මක කිරීමට ප‍්‍රාන්ත රජයයන්ට අවශ්‍ය උපදෙස් ලබා දී ඇති බවත් සහන සේවා කටයුතු මේ වනවිට ආරම්භ වී ඇති බවත් පිලිපීන රජය කියා සිටී.

පිලිපීන ආපදා කලමණාකරණ අමත්‍යාංශය කියා සිටින්නේ ලක්ෂ 6 කට වැඩි පිරිසකට නිවාස අහිමි වී ඇති බවත් එම පිරිස් මේ වනවිට පාසල්වල පිහිටුවූ සරණාගත කඳවුරුවල රැඳී සිටින බවත්ය.

නායයෑම් සහ ජල ගැලීම් හේතුවෙන් කොටුවූවන් බේරා ගැනීමට හමුදාව හෙලිකොප්ටර් යානා යොදා ගන්නා බව මාධ්‍ය වාර්තා පෙන්වා දුන්නේය.