ආගම දහමට ඇති නැඹුරුව මිනිස් මොළයේ වර්ධනයට බෙහෙවින් උපකාරවන බව ඇමෙරිකාවේ කරන ලද පරීක්ෂණයකින් තහවුරු වී තිබේ.

මානසික පීඩනයක් සහිත ඉතිහාසයක් ඇති පුද්ගලයන් ආගමට දහමට නැඹුරු කිරීමෙන් මො‍ළයේ සැළකිය යුතු වර්ධනයක් සිදුව ඇතැයි ද එම ප‍ර්යේෂකයෝ පවසති.

කොලොම්බියා විශ්වවිද්‍යාලයේ මනෝ විද්‍යාව සම්බන්ධ මහාචාර්ය මර්නා විස්මන් පවසන්නේ මිනිසාගේ විශ්වාසයන් හා හැසිරීම් මොළය අභ්‍යන්තරයේ පරාවර්ථනය වන බවයි. එය නවීන තාක්ෂණයෙන් හ දුනාගත හැකි බවත් පර්යේෂකයන් පෙන්වාදෙයි.

මොළය යනු මිනිස් සිරුරේ අතිවිශේෂිත ම වූ අවයවයකි. එමගින් සිරුර පමණක් නොව අපගේ හැසිරීම් ද පාලනය කරයි. මොළයේ වර්ධනය හා අධ්‍යාත්මිකතාව අතර සම්බන්ධය පුදුම සහගතයැයි මහාචාර්ය විස්මන් පවසයි.

මිනිසුන් ආගමට නැඹුරුවීම මොළයේ වර්ධනයට යහපත් බවත් මානසික පීඩනය අවම කිරීමට එය හේතුවක් වන බවත් පර්යෝෂකයෝ පෙන්වාදෙති.

පර්යේෂකයන් පවසන්නේ ආගමට හා අධ්‍යාත්මකි දේ වෙනුවෙන් යොමු වූවන්ට වඩා එලෙස යොමු නොවූවන්ගේ මොළයේ බාහිකයේ ඝනකම අඩු බවයි. මේ පර්යේෂණය සදහා අවුරුදු 18 සිට 54 දක්වා වයසේ පසුවන වැඩිහිටියන් 103 දෙනකු යොදාගෙන ඇත.

පර්යේෂණයට සහභාගී වූ සියළු දෙනා මින් ඉහත මානසික පීඩනයකින් පෙළුණු අයගේ දරුවන් හෝ මුණුපුරු මිනිපිරියන් වීම ද විශේෂත්වයකි. ඔවුන්ගේ ආගමික නැඹුරුව ගැන දෙවරක් ප්‍රශ්න කරමින් සමීක්ෂණය පැවැත්වූ පර්යේෂකයන් අනතුරුව මොළයේ බාහිකයේ ඝනකම ද මැන බැලූහ. ඒ අනුව ඉහත ප්‍රතිඵල ප්‍රකාශයට පත්කැර ඇත.

උතුරු කැරොලිනා හි ඩියුක් විශ්වවිද්‍යාලයේ මනෝවිද්‍යාව සම්බන්ධ මහාචාර්ය ඩෑන් බ්ලේසර් පවසන්නේ මේ අධ්‍යයනය ඉතා සිත්ගන්නා සුළු දෙයක් වුවත් එය තවදුරටත් ගවේෂණය කළ යුතු බවයි. ඔහු පවසන්නේ මොළයේ බාහිකය පමණක් නොව වෙනත් ප්‍රදේශ ද ආගම හා අධ්‍යාත්මය සම්බන්ධ බවයි. එමෙන්ම ඒ සදහා සමාජ ආර්ථික තත්ත්වය ද සම්බන්ධ විය හැකියැයි හෙතෙම පෙන්වාදෙයි.