(දයාසීලි ලියනගේ)  
පළාත් පාලන මැතිවරණයේ ඡන්දය ගණන් කිරීම, ඡන්ද මධ්‍යස්ථානවලදීම සිදු කිරීමට මැතිවරණ කොමිසම ගෙන ඇති තීරණය සම්බන්ධයෙන් දේශපාලන පක්ෂ ගණනාවක ආසන සංවිධායකවරුන් විරෝධය දක්වා ඇතැයි වාර්තාවේ.  

ගණන් කිරීමේ පොදු මධ්‍යස්ථානයකට ඡන්ද පෙට්ටි ගෙනැවිත් ඡන්දය ගණන් කරන ලෙස ඔවුහු ඉල්ලා සිටිති.   

කොට්ඨාස මට්ටමේ ඡන්ද මධ්‍යස්ථානවල ඡන්දය ගණන් කර ප්‍රතිඵල ප්‍රකාශයට පත් කිරීමේදී ඡන්ද දායකයන් අතර කලකෝලාහල ඇතිවීම වැළැක්වීමට නොහැකිවනු ඇතැයි ආසන සංවිධායකවරුන් ගණනාවක්ම මැතිවරණ කොමිසමට පෙන්වා දී ඇතැයිද වාර්තාවේ.  

මේ සම්බන්ධයෙන් කළ විමසීමකදී දකුණු පළාත් සභා මන්ත්‍රී රත්ගම ශ්‍රීලනිප ආසන සංවිධායක අමරසිරි කුරුවගේ මහතා ප්‍රකාශ කළේ ඡන්ද මධ්‍යස්ථානවලදී ඡන්දය ගණන් නොකරන ලෙසට ලබන සතියේදී ජනාධිපති මෛත්‍රීපාල සිරිසේන මහතා හමුවූ විට ඉල්ලා සිටින බවයි.