(මහින්ද නිශ්ශංක)  

ශ්‍රී ලංකා දුම්රිය දෙපාර්තමේන්තුව සඳහා සේවකයන් 1500ක් පමණ බඳවා ගැනීමට ප්‍රවාහන හා සිවිල් ගුවන් සේවා අමාත්‍ය අර්ජුන රණතුංග මහතා කටයුතු කරන බව දුම්රිය වෘත්තීය සමිති සන්ධානය පවසයි.  

දැනට වසර පහක පමණ සිට දෙපාර්තමේන්තුවේ අනියම්, ආදේශක, තාවකාලික හා කොන්ත්‍රාත් පදනමේ සේවකයන් 1500ක් පමණ සිටින බවත් ඔවුන් ස්ථිර කරන ලෙස තම සන්ධානය අමාත්‍යවරයා ගෙන් ඉල්ලා තිබෙන බවත් පැවසූ එම වෘත්තීය සමිති සන්ධානයේ සමකැඳවුම්කරු එස්.පී. විතානගේ මහතා එම සේවකයන් ස්ථිර නොකර තම දේශපාලන හිතවතුන් දුම්රියට බඳවා ගැනීමට යාම විශාල අපරාධයක් මෙන්ම මානව හිමිකම් උල්ලංඝනය කිරීමක් බව ද කීය.  


දුම්රිය දෙපාර්තමේන්තුවට අලුතින් සේවකයන් බඳවා ගැනීම යටතේ මේ වනවිට අමාත්‍යවරයා නාමලේඛන එවන ලෙස ඇමැතිවරුන්ට හා මන්ත්‍රීවරුන්ට දැනුම් දී ඇති බවට තොරතුරු ලැබී ඇතැයි ද විතානගේ මහතා පැවසීය.  


හිටපු ප්‍රවාහන අමාත්‍යවරුන් වන කුමාර වෙල්ගම හා රංජිත් මද්දුමබණ්ඩාර යන මහත්වරුන්ගේ සේවා කාලය තුළ මෙම අනියම්, ආදේශ, තාවකාලික හා කොන්ත්‍රාත් පදනම යටතේ මෙම සේවකයන් 1500 බඳවාගෙන ඇතැයි ද ඒ මහතා කීය.