සුජිත් හේවාජුලිගේ

දූෂණ විරෝධී පනත යටතේ වත්කම් බැරකම් ඉදිරිපත් කළ යුතු  නිලධාරීන් අතරින් 34,000කට ආසන්න පිරිසකගෙන් ප්‍රමාද ගාස්තු අයකර ගැනීමට හඳුනාගෙන ඇතැයි අල්ලස් හෝ දූෂණ චෝදනා විමර්ශන කොමිෂන් සභා ආරංචි මාර්ග පවසයි.

ඒ අනුව කටයුතු කිරීමට කොමිෂන් සභාවේ මෙහෙයුම් පුළුල් කර ඇති බව එහි අධ්‍යක්ෂ ජනරාල් රංග දිසානායක ප්‍රකාශ කළේය.

ප්‍රමාද ගාස්තු අය කර ගන්නා ක්‍රියාවලියෙන් ලැබෙන දඩ මුදල් කොමිසමේ අරමුදලට බැර වන බවද අධ්‍යක්ෂ ජනරාල්වරයා පවසයි.

පාර්ලිමේන්තු මන්ත්‍රී ආචාර්ය හර්ෂ ද සිල්වා ගේ සභාපතිත්වයෙන් පසුගියදා පාර්ලිමේන්තුවේදී රැස් වූ රජයේ මුදල් පිළිබඳ කාරක සභාවට  අල්ලස් හෝ දූෂණ චෝදනා විමර්ශන කොමිෂන් සභාවේ ප්‍රධානීහු  කැඳවනු ලැබ සිටියහ. එහිදී අධ්‍යක්ෂ ජනරාල්වරයා මේ බව සඳහන් කළේය.

දූෂණ විරෝධී පනතේ 31 වගන්තිය යටතේ කොමිෂන් සභාව සඳහා වෙනම අරමුදලක් ස්ථාපිත කර ඇත. ඒකාබද්ධ අරමුදල සහ කොමිෂන් සභා පොදු අරමුදල මඟින් ගෙවීම් කරන ආකාරය පිළිබඳව ද මෙහිදී සාකච්ඡා කෙරිණ.

මේ අතර කොමිෂන් සභාව සඳහා කාර්ය මණ්ඩලය 971 දෙනකු බඳවා ගැනීමට කටයුතු කරන බවත්, 2026 දෙසැම්බර් 31 දිනට පෙර ප්‍රාදේශීය කාර්යාල 23ක් පිහිටුවීමේ ඉලක්කය සැපිරීම සඳහා දිස්ත්‍රික් ලේකම්වරුන් මගින් දැනට පවතින රජයේ ගොඩනැගිලි පරීක්ෂා කර ඇති බවත් අනාවරණය කෙරිණ.

ඇතැම් ගොඩනැඟිලි අලු‍ත්වැඩියා කර භාවිතයට ගැනීමටත්, ඉතිරිය කුලී පදනම මත ලබා ගැනීමටත් සැලසුම් කර ඇති බව අධ්‍යක්ෂ ජනරාල්වරයා සඳහන් කළේය.