( තිළිණි ද සිල්වා )

එන්නත් කරණය ගැන ජනතාවට දැනුවත් කිරීමට අවශ්‍ය සහය දීම හා කොවිඩ්-19 මර්ධනය කිරීමේදී එන්නත්කරණ ව්‍යාපාරය රටපුරා ව්‍යාප්ත කිරීමට සෞඛ්‍ය ප්‍රවර්ධන කාර්යාංශය සමඟ ෆේස්බුක් ආයතනය සහයෝගීතාවයකට එළැඹ ඇත.

මෙම මූලිකත්ව වැඩසටහන හරහා ශ්‍රී ලංකාවේ ජාතික එන්නත්කරණ ව්‍යාපාරයට සහයෝගය දීම සදහා ෆේස්බුක් ආයතනය  විවිධ ක්‍රියාමාර්ග කිහිපයක් ගෙන ඇති අතර , ඒ යටතේ කොවිඩ්-19 එන්නත්කරණ තොරතුරු පහසුවෙන් දැන ගැනීමේ හැකියාව වැඩිකිරීමට සෞඛ්‍ය ප්‍රවර්ධන කාර්යාංශ වෙබ් අඩවිය වෙත ජනතාව යොමු කිරීම සිදු කරයි.

එන්නත්කරණ ව්‍යාපාරයට ජනතාව සහය දක්වන බව තමන්ටම ප්‍රදර්ශනය කරගැනීමේ හැකියාව එය දිරිමත් කිරීම සඳහා කොවිඩ්-19 ප්‍රොෆයිල් ෆ්‍රේම් එකක් ෆේස්බුක්හී හඳුන්වාදීමට ද කටයුතු කරයි.

ලාංකිකයන්ට කොවිඩ්-19 වෛරසය පිළිබඳව ඇති වැරදි තොරතුරු හඳුනාගැනීමට සහ ඒවාට විරුද්ධව නැඟී සිටීමට අවශ්‍ය දැනුම ඇතුළු සෞඛ්‍ය දැනුවත්භාවය ලබාගැනීම වෙනුවෙන් www.fightcovidmisinfo.com යන වෙබ් අඩවිය ඔස්සේ පොදු අධ්‍යපනික ප්‍රචාරණ ව්‍යාපාරයක් දියත් කිරීම සිදු කෙරේ.

මුව ආවරණ පැළඳීම සහ නිසි සෞඛ්‍ය හුරුපුරුදු දිගටම පවත්වාගැනීම දිරිමත් කරමින් ජනතාව තවදුරටත් කොවිඩ්-19 තොරතුරු කේන්ද්‍රය වෙත යොමු කිරීමද ෆේස්බුක් ආයතනය විසින් සිදු කරමින් පවතී.