(බිඟුන් මේනක ගමගේ සහ හර්ෂණ තුෂාර සිල්වා)

නව අගමැතිවරයා පත්කිරීම ව්‍යවස්ථා කුමන්ත්‍රණයක් යැයි එක්සත් ජාතික පක්ෂය නඟන චෝදනාව මුළුමනින්ම ප්‍රතික්ෂේප කරන බවත් ජනාධිපතිවරයා සියලු කටයුතු කර ඇත්තේ ආණ්ඩුක්‍රම ව්‍යවස්ථාවෙන් ඔහුට පැවැරී ඇති බලතල අනුව බවත් මහාචාර්ය ජී.එල් පීරිස් මහතා පවසයි.

19 වැනි සංශෝධනයේ 42(4) වගන්තියේ සඳහන් පරිදි ජනාධිපතිවරයාගේ මතය අනුව පාර්ලිමේන්තුවේ විශ්වාසය උපරිම වශයෙන් ඇති මන්ත්‍රීවරයා ජනාධිපතිවරයා විසින් අග්‍රාමාත්‍යවරයා ලෙස පත්කරනු ලැබූ බවත් විවිධ ප්‍රකාශ නිකුත් කරමින් රට නොසන්සුන් කිරීමෙන් වළකින්නැයි රනිල් වික්‍රමසිංහ මහතාගෙන් ඉල්ලා සිටින බවත් මහාචාර්ය පීරිස් මහතා කීය.

මහාචාර්යවරයා නව අගමැතිවරයා පත්කිරීමේ නීතිමය තත්ත්වය ව්‍යවස්ථාව ඇසුරෙන් පැහැදිලි කළේ මෙසේය. 

මෙහිදී වැදගත් වන්නේ අගමැතිතුමා නිලයෙන් ඉවත් වුණා යැයි නිගමනයට එළැඹිය හැක්කේ කවර අවස්ථාවකදී ද යන්නයි. 19 වැනි සංශෝධනයේ 2 වැනි වගන්තියේ මෙය පැහැදිලිව නිර්වචනය කර තිබෙනවා. 

අග්‍රාමාත්‍යවරයා ආණ්ඩුක්‍රම ව්‍යවස්ථාවේ විධිවිධාන යටතේ යම්තාක් කල් අමාත්‍ය මණ්ඩලය පවත්වන්නේ ද ඒ තාක්කල් ස්වකීය ධූරය දරන්නේය යනුවෙන් එහි සඳහන් වෙනවා. අමාත්‍ය මණ්ඩලය ක්‍රියා විරහිත වුවහොත් අනිවාර්යෙන් අගමැතිවරයාට එම තනතුර අහිමි වෙනවා. 

රනිල් වික්‍රමසිංහ මහතා අග්‍රාමාත්‍ය ධූරය දැරූ අමාත්‍ය මණ්ඩලයේ පැවැත්ම 26 සවස අවසන් වුණා. එය සිදුවුණේ මෙහෙමයි. 

19 වැනි සංශෝධනය සම්මත වූ දින සිට ශ්‍රී ලංකා ආණ්ඩුවට සිටිය හැකි අමාත්‍යවරු උපරිම සංඛ්‍යාව 30 යි. රාජ්‍ය හා නියෝජ්‍ය ඇමැතිවරු උපරිමය එක්ක 70 යි. ඒ කියන්නේ සෙසු ඇමැතිවරු 40යි. හැබැයි මේ සීමාව බල නොපාන එක් අවස්ථාවක් තිබෙනවා. 46(4) මෙය පැහැදිලිව තිබෙනවා. පාර්ලිමේන්තුවේ බහුතර බලය ඇති පක්ෂය වෙනත් පක්ෂයක් සමඟ හවුලේ ආණ්ඩුවක් ඇතිකර ගන්නවා නම් එවන් අවස්ථාවකදී අර උපරිම සීමාව බලපාන්නේ නෑ. ඒක ව්‍යතිරේඛයක් යයිද ජී.එල්. පීරිස් මහතා පැවසීය.