(ක්‍රිෂාන්ජීවක ජයරුක්)

මාතර විශ්ව විද්‍යාලයේ විද්‍යායතන භූමියේ පිහිටි රජයේ වී ගබඩාවට වී තොග රැගෙන ඒමට ඉඩ ලබානොදී පොලිස් රාජකාරියට බාධා කර අධිකරණ නියෝගය උල්ලංඝනය කළ බව කියන සිසුන් 13 දෙනෙකු අද (03) සැකපිට ප්‍රශ්න කිරීම සඳහා අත්අඩංගුවට ගත් බව මාතර පොලිසිය පවසයි.

සිසුන්ගේ විරෝධය නොතකා වී ගෝනි පුරවන ලද ලොරි දෙකක් රජයේ වී ගබඩාවට රැගෙන ගොස් ගබඩා කළ බව පොලිසිය පැවැසීය.

එහිදී පොලිසිය හා විරෝධතාවයේ නිරත සිසුන් අතර දැඩි උණුසුම් තත්වයක් හට ගත්තේය.

අදාල වී ගබඩාවට වී රැගෙන යාමට පොලිසිය අධිකරණ නියෝගයක් ද ලබා ගෙන තිබුණි.

ඉකුත් 27වැනිදා ද සිසුන් මේ ආකාරයට ප්‍රධාන දොරටුව වසා වී තොග රැගෙන යාමට ඉඩ ලබා නොදුන් අතර පසුව පොලිසිය එම උත්සාහය අත්හැර විසිර ගියේය.

පසුව යලිත් අද (03) වී තොග රැගෙන ආ අවස්ථාවේදී මෙම උණුසුම් තත්වය ඇති විය.

මාතර රජයේ වී ගබඩා භූමියේ කොටසක් මෙම විශ්ව විද්‍යාලයේ විද්‍යායතනය ඉදි කිරීමට ලබා දී තිබූ අතර ඉඩකඩ පහසුකම් ප්‍රමාණවත් නොමැති නිසා එම කොටසද තම විද්‍යායථනයට ලබා දෙන්නැයි සිසුන්ගේ ඉල්ලීමවී තිබේ.

කෙසේ නමුදු අයුතු ජනරාශියක සාමාජිකයින් වීම,පොලිස් රාජකාරියට බාධා කිරීම,බලහත්කාරය පෑම හා අධිකරණ නියෝගය උල්ලංඝනය කිරීම ආදී චෝදනා රැසක් යටතේ සැකකාර සිසුන් 13දෙනා පොලිසිය සැකපිට අත්අඩංගුවටගෙන ඇත.

ඔවුන් හෙට (04) දින මාතර මහේස්ත්‍රාත් අධිකරණය වෙත ඉදිරිපත් කිරීමට නියමිතව තිබුණි.