( තිළිණි ද සිල්වා සහ  රංජන් කටුගම්පොළ )

අධිකරණයට අපහාස කරන ලදැයි සමාජ සාධාරණත්වය සඳහා වූ ජාතික ව්‍යාපාරයේ කැඳවුම්කරු හා කොළඹ විශ්ව විද්‍යාලයේ සිංහල භාෂාව පිළිබඳ මහාචාර්ය සරත් විජේසූරිය මහතාට එරෙහිව ගොනු කර ඇති පැමිණිල්ල සම්බන්ධයෙන් ලබන නොවැම්බර් 21 වැනි දින හෝ ඊට පෙර විරෝධතා ගොනු කරන්නැයි ඒ මහතාට අභියාචනාධිකරණය අද (26) නියෝග කළේය.

මහාචාර්ය සරත් විජේසූරිය මහතාට එරෙහි මෙම පැමිණිල්ල අභියාචනාධිකරණ විනිසුරු අචල වෙංගප්පුලි මහතා හමුවේ අද කැඳවූ අතර එහිදී මෙම නියෝගය නිකුත් කෙරිණි.

එසේම පැමිණිල්ල නොවැම්බර් 25 වැනිදා යළි කැඳවීමටද නියෝග කෙරිණි.

කුලියාපිටිය ප‍්‍රදේශයේ පදිංචි නීතීඥ සම්පත් විජිත කුමාර සහ විශ‍්‍රාමික යුද හමුදා නිලධාරී අනිල් වසන්ත අල්විස් යන මහත්වරුන් විසින් ගොනු කර තිබූ මෙම පෙත්සමෙහි වගඋත්තරකරු ලෙස සමාජ සාධාරණත්වය සඳහා වූ ජාතික ව්‍යාපාරයේ කැඳවුම්කරු මහාචාර්ය සරත් විජේසූරිය මහතා නම් කරනු ලැබ ඇත.

‘‘ උසාවිය නිහඬයි ’’ චිත‍්‍රපටයට එරෙහිව අධිකරණයෙන් වාරණයක් නිකුක් කිරීම සම්බන්ධයෙන් ස්වාධීන සිනමා ව්‍යාපරය නියෝජනය කරමින් 2016 ඔක්තෝබර් 16 වැනි දින වගඋත්තරකාර මහාචාර්යවරයා විසින් සිදු කළැයි කියන විවේචනය ඇතළත් වීඩියෝව ‘‘ යූ ටියුබ් ’’ අන්තර්ජාල සමාජ මාධ්‍ය ඔස්සේ  විකාශය වී ඇත.

‘‘ ජන අරගලයක පිය සටහන් ’’ නමින් ග‍්‍රන්ථයක් එම වසරේ සැප්තැම්බර් 13 වැනි දින දොරට වැඩීමේ උළෙලේ දී වගඋත්තරකරු විසින් කරන ලද කථාව මගින් ද ,  2016 වසරේ අගෝස්තු 16 වැනිදා සිරස ටීවී මඟින් විකාශය කළ ‘‘ සටන වැඩසටහන හරහා වගඋත්තරකරු විසින් සිදු කළැයි කියන අදහස් දැක්වීම් , එම වසරේ අගෝස්තු 13 වැනි දින කොළඹ 07 පදනම් ආයතනයේ දී පැවති ‘‘ හුදකලාව ’’ නැමැති ග‍්‍රන්ථය දොරට වැඩීමේ උළෙලේ දී වගඋත්තරකරු වසින් සිදු කරන ලද කථාව මඟින්ද , 2017 වසරේ නොවැම්බර් 19 වැනි දා පැවති අපවත් වී වදාළ මාදුළුවාවේ සෝභිත හිමියන්ගේ දෙවැනි ගුණානුස්මරණ උත්සවයේ දී වගඋත්තරකරු ‘‘ දිවයින ’’ පුවත්පතට සිදු කළැයි කියන ප‍්‍රකාශ හේතුවෙන් අධිකරණයට අපහාසයක් සිදු වී ඇත.

වගඋත්තරකරුගේ එම ප‍්‍රකාශයන් මඟින් අධිකරණයත්, විනිසුරුවරුන් විවේචනය කර ඇතැයි පැමිණිලිකාර පාර්ශවය සිය පැමිණිල්ලෙන් පෙන්වා දෙති.

එබැවින් මේ සම්බන්ධයෙන් වගඋත්තරකරුවන්ට දඬුවම් නොකිරීමට හේතු දක්වන ලෙසට සිතාසි නිකුත් කරන ලෙස පෙත්සම්කරුවෝ සිය පැමිණිල්ලෙන් ඉල්ලා සිටිති.

පෙත්සම්කරුවන් වෙනුවෙන් නීතීඥ රවීන්ද්‍රනාත් දාබරේ මහතාගේ උපදෙස් මත ජනාධිපති නීතීඥ සංජීව ජයවර්ධන මහතා පෙනී සිටියහ.