(ඩයනා උදයංගනී)

ප්‍රසිද්ධ හා දක්‍ෂ හිටිවන කවියකු වූ ජී. ඇම්. අජිත් මහතා අභාවප්‍රාප්ත විය.

ඔහු මියයන විට 62 හැවිරිදි වියෙහි පසුවිය.

හිටපු ජනාධිපති මෛත්‍රීපාල සිරිසේන මහතාගේ සංස්කෘතික කටයුතු උපදේශකවරයෙක් ලෙස ද කටයුතු කළ අජිත් කවියා ශ්‍රී ලංකා ගුවන් විදුලි සංස්ථාවේ උපදේශකවරයකු ලෙස ද කටයුතු කළේය.

කොළඹ යුගයේ ප්‍රසිද්ධ කවියකු වූ ගාල්ලේ ජී.ඇම් පියදාස කවියාගේ පුතණුවන් වූ ජී.ඇම් අජිත් කවියාගේ බිරිඳ වන ශ්‍රියා හිඳුරංගල මහත්මිය ද කිවිඳියකි.

ඔහුගේ දියණිය කුරවි කූජනා මෙන්ම පුත් පද්‍ය භාසුරු ද හිටිවන කවි හා විරිඳු ගායනයෙහි දස්කම් දක්වති.

සමස්ත ලංකා සිංහල කවි සම්මේලනයේ ප්‍රධාන ලේකම්වරයා ලෙස ද කටයුතු කළ ජී.ඇම් අජිත් කවියා සිංහල තරුණ කවි සමාජයේ නිර්මාතෘවරයා ද වේ.

විසිහතර පැයේ කවි මඩු සම්ප්‍රදාය ආරම්භ කළේ ද ජී. ඇම් අජිත් කවියා වන අතර වන අතර ඔහු වාර්ෂිකව ‘සමුළු කවි’ නමින් කවි පොතක් ද ප්‍රකාශයට පත් කළේය.

කොළඹ නාලන්දා විද්‍යාලයේ ආදි ශිෂ්‍යයකු වන ජී.ඇම් අජිත් කවියා කැලණිය විශ්ව විද්‍යාලයේ උපාධිධාරියෙකි.

ඔහු කාව්‍ය ග්‍රන්ථ රැසක කතුවරයෙකි. දේහය රාජගිරිය, නාවල පාර, අංක 514/ඒ ලිපිනයේ පිහිටි නිවසේ තැන්පත් කර ඇති අතර අවසන් කටයුතු නාවල සුසාන භූමියේ දී අනිද්දා (13) පස්වරුවේ සිදුකෙරේ.