(අජන්ත කුමාර අගලකඩ)  
 ශ්‍රී ලංකා නිදහස් පක්ෂය සහ ඒකාබද්ධ විපක්ෂය අතර එකඟතාවක් ඇතිකර ගැනීම සඳහා දෙපාර්ශ්වය විසින් පත් කරන ලද කමිටු දෙක මේ සති අන්තයේදී හමුවී සාකච්ඡා කිරීමට නියමිතව ඇත.  


ඒ අනුව එම සාකච්ඡාව ඊයේ (25) පස්වරුවේ පැවැත්වීමට නියමිතව තිබූ බව දේශපාලන ආරංචි මාර්ග සඳහන් කරයි.  

ශ්‍රී ලංකා නිදහස් පක්ෂය හා ඒකාබද්ධ විපක්ෂය අතර එකඟතාවක් ඇතිකර ගැනීම සඳහා සාකච්ඡා කිරීමට ශ්‍රී ලංකා නිදහස් පක්ෂය විසින් කමිටුවක් පත් කෙරී ඇති අතර, ඇමැතිවරුන් වන නිමල් සිරිපාල ද සිල්වා, අනුර ප්‍රියදර්ශන යාපා සහ නියෝජ්‍ය ඇමැති ලසන්ත අලගියවන්න යන මහත්වරුද එම කමිටුවට ඇතුළත්ව සිටිති.  


ඒකාබද්ධ පක්ෂය ද මන්ත්‍රීවරුන් තිදෙනකුගෙන් යුත් කමිටුවක් පත්කර ඇති අතර මහින්දයාපා අබේවර්ධන, සී.බී. රත්නායක යන මහත්වරු සහ පවිත්‍රා වන්නිආරච්චි මන්ත්‍රීවරිය එම කමිටුවේ සාමාජිකයෝ වෙති.   


එම කමිටු දෙක මේ සති අන්තයේදී පළමු වරට හමුවීමට නියමිතව ඇත.  පළාත් පාලන මැතිවරණයට එක්ව තරග කිරීම සඳහා ශ්‍රී ලංකා නිදහස් පක්ෂය යෝජනා මාලාවක් ඒකාබද්ධ විපක්ෂයට ඉදිරිපත් කර ඇති අතර ඒකාබද්ධ විපක්ෂයද ශ්‍රීලනිපය සඳහා කොන්දේසි කිහිපයක් ඉදිරිපත් කර ඇතැයි වාර්තා වේ.  ඉදිරි පළාත් පාලන මැතිවරණයට එක්ව තරග කිරීමට නම් ශ්‍රී ලංකා නිදහස් පක්ෂය ආණ්ඩුවෙන් ඉවත්විය යුතු බවට ඒකාබද්ධ විපක්ෂය යෝජනා කර ඇත.   


මේ අතර ආණ්ඩුවේ ඇමැතිවරුන් වන සුසිල් ප්‍රේමජයන්ත සහ ඩබ්ලිව්.ඩී.​ෙජ්. සෙනෙවිරත්න යන මහත්වරුන්ද ඉකුත් බදාදා උදේ කොළඹ 07, විජේරාම නිල නිවසේදී හිටපු ජනාධිපතිවරයා හමුවී සිය යෝජනාවලිය ඉදිරිපත් කර ඇතැයි වාර්තා වේ.