(විනීතා එම් ගමගේ)

දිවයින පුරා පිහිටි නිරෝධායන මධ්‍යස්ථාන 14 ක පුද්ගලයින් 1455 දෙනෙක් මේ වනවිටත් නිරෝධායනය වෙමින් සිටින බව යුද හමුදාව කියයි.

ශ්‍රී  ලංකා යුද හමුදාව නිකුත් කර ඇති තොරතුරු අනුව දියතලාව, කන්දකාඩු, මඩකලපු, යාපනය හා අම්පාර යන ප‍්‍රදේශවල පිහිටි නිරෝධායන මධ්‍යස්ථාන මේ වනවිට ක‍්‍රියාත්මක වෙමින් පවතින අතර මෙම පිරිස එහි නිරෝධායනය වෙමින් සිටිති.

මේ වනවිට නිරෝධායන මධ්‍යස්ථාන 52 ක් ආරම්භ කර ඇති අතර 4905 දෙනෙක් එහි නිරෝධායනය වී තිබේ. විදේශිකයන් 31 දෙනෙක් ඇතුළු විදෙස් රටවලින් පැමිණි 3577 දෙනෙක් ද රට අභ්‍යන්තරයෙන් හමුවූ 1328 දෙනෙක් ද මෙම මධ්‍යස්ථානවල නිරෝධායනයට ලක්වුහ.

මේ පිරිස අතරින් විදෙස් රටවලින් පැමිණි 36 දෙනෙක් හා මෙරටින් නිරෝධායනයට ලක්කළ 25 දෙනෙක් කොරෝනා ආසාදිතයින් ලෙස හදුනාගනු ලැබූ  බව ද හමුදා මාධ්‍ය අංශය කියයි.

ඉකුත් පෙබරවාරි පළමුවැනිදා පළමු නිරෝධායන මධ්‍යස්ථානය දියතලාවේ ආරම්භ වූ අතර වූහාන් හි සිට මෙරටට ගෙන්වා ගනු ලැබූ සිසුන් 33 දෙනා නිරෝධායනය කරමින් මෙරට නිරෝධායන වැඩ පිළිවෙල ආරම්භ කරනු ලැබීය.

අනතුරුව මාර්තු 10 වැනිදා කන්දකාඩුවේ නිරෝධායන මධ්‍යස්ථානය ආරම්භ වූ අතර එතැන් සිට දිවයින පුරා මෙම මධ්‍යස්ථාන ආරම්භ කරනු ලැබීය.

මෙම නිරෝධායන මධ්‍යස්ථානවලින් ගුවන් හමුදාව විසින් තුනක් ද නාවික හමුදාව විසින් දෙකක් ද ඉතිරිය යුද හමුදාව මගින් ද පවත්වාගෙන යනු ලබයි.