කතානියා නගරයේ සමාජ සුබසාධන සමිතියක් වූ Vois of Sri Lankan (VOS) සමිතියට වසර 2ක් පිරීම නිමිත්තෙන් අති දැවැන්ත වැඩසටහනක් එහි සාමාජිකයන් විසින් 2019.10.19 වැනි දින සංවිධානය කර තිබුණි. සිංහල සංස්කෘතියට මුල් තැන දෙමින් නර්තනයෙන්ද, සිංහල ඇඳුම් පැළඳුම්වලට මුල් තැන දෙමින් සිංහල ක්‍රමයට නෙළුම් පතේ කෑම කමින් රිසි සේ විනෝද වීමට අවස්ථාව සලසා තිබූ අතර සිසිලියේ ජනප්‍රිය දක්ෂ සංගීත කණ්ඩායමක් වන ‘ෂා’ සංගීතයෙන් රාත්‍රිය සංගීතවත් කළේය.   

සිංහල සංස්කෘතිය ලෙස සාරිය, ඔසරිය, සරම, කමිසය සහ රෙද්ද හැට්ටයට මුල් තැන දෙමින් හොඳම ගැමි පවුල, ගැමි යුවල, ගැමි කුමරිය සහ ගැමි කුමරා තේරීම මෙම උත්සවයේ කැපී පෙනුන අංගයකි. 

ඇත්තටම මෙවැනි කර්තව්‍යයන් අප අගය කළ යුතුමය. සයුරෙන් ඈත එපිට ජීවත්වෙන අපට අපේකම, අපේ සංස්කෘතිය ලොවට ගෙන යා හැක්කේ මෙවැනි දේවල්වලින්මය. 
Vois of Sri Lankan සාමාජික සාමාජිකාවන් උපරිම වෙහෙසක් දරා ඉතා සාර්ථකව මෙම කර්තව්‍යය සංවිධානය කළ බවට අටුවා ටීකා අවශ්‍ය නොවේ. එය අප නෙත් දෙකින්ම දැක ගත්තෙමු. 

VOS සංවිධානයේ සභාපතිතුමා වන අජිත් ප්‍රනාන්දු මහතාට සහ ලේකම් ප්‍රගීත් පෙරේරා තරුණ මහතාට සහ එහි සියලුම දෙනාට ඉදිරියේදීත් මෙවැනි කර්තව්‍යයන් කිරීමට අවශ්‍ය ශක්තිය සහ ධෛර්යය ලැබේවායි එක සිතින් ප්‍රාර්ථනා කරමු.  

කාන්ති රතුගම - කතානියා