බස් රථ රියැදුරකුගේ පාවහන් යුගලක් සොරකම් කොට එම බස් රථයේම කොන්දොස්තර මහතාට රුපියල් සියයකට විකුණූ පුවතක් මහියංගණ ප්‍රදේශයෙන් වාර්තා වේ. 


රාත්‍රී කොළඹ දක්වා දිවෙන පෞද්ගලික බස් රථයක් තම ගමන්වාරය එළඹෙන තුරු බස් නැවතුම්පොළේ නවතා රියැදුරු බස් රථයෙන් බිමට බැස තම කකුලේ එක් සෙරෙප්පුවක් ගලවා එම කකුල බස් රථයට හේත්තු කරගෙන ටික වේලාවක් තනි කකුලෙන් සිට ඇත.
නැවත කකුලට සෙරෙප්පුව දමා ගැනීමට සූදානම් වනවිට එම සෙරෙප්පුව නොමැති නිසා කලුවරේ බල්ලෙක්වත් ගෙන යෑමට ඇතැයි සිතා අනෙක් සෙරෙප්පුව ද විසිකොට බුලත් විටක් ගැනීමට එතැනින් ඉවත් වී ළඟපාත කඩයකට ගොස් ඇත. 


පාන්දර වනවිට කොළඹට පැමිණ බසයෙන් මගීන් බස්සවා සුපුරුදු පරිදි බස් රථය නවත්වන ස්ථානයට ගොස් රියැදුරු කොන්දොස්තර දෙදෙනා අතපය මුහුණ සෝදා ගැනීමට යාමේදී කොන්දොස්තර විසින් තමා පෙර දින රාත්‍රී බස් නැවතුමේ තරුණයකුගෙන් රුපියල් සියයකට අලුත්ම පාවහන් යුගලක් මිලදී ගත් අතර එය හොඳ ද කියා රියැදුරුගෙන් විමසා ඇත. 


එවිට රියැදුරු මෙය තමාගේ පෙරදින නැතිවූ සෙරෙප්පුව බවත් මිලදී ගත්තේ කාගෙන්ද බවත් අසා ඇත. එවිට කොන්දොස්තර බස් නැවතුමේදී තමාට පාවහන් යුගල විකිණූ තරුණයා පිළිබඳ පවසා ඇත. 


ඔහු පිළිබඳව ඔවුනට එතරම් නිච්චියක් නොවූවත් නගරයේ එවැනි සොරකම් කරන පුද්ගලයින් නැතුවා ද නොවේ යන්න දෙදෙනාටම සිහිවී ඇත.


එහෙනම් මේ සෙරෙප්පු ජෝඩුව තියාගන්න කියා කොන්දොස්තර විසින් නැවතත් රියැදුරුට එය භාර දී ඇත. පසුව දෙදෙනාම බඩ අල්ලන් සිනාසුනේ ගමන් විඩාව සන්සිඳුවා ගැනීමට මෙනි. 
(ගලහ ඩබ්ලිව්.ඒ. අසේල)