ගම්මිරිස් කැඞීමට ගිය හොරාට වත්තේම නින්දගොස් සිටියදී, ඉඩම් හිමියාගෙන් ගුටිකා පැනගිය පුවතක් අසල ගමකින් වාර්තා විය.

සිද්ධිය සැකවින් මෙසේයි.

ඔහු අධික ලෙස මත්වතුරට ඇබ්බැහිවූ අයෙකි. ඒ සඳහා මුදල් උපයාගන්නේ කෙසෙල් කැනක්, පුවක් වල්ලක්, ගම්මිරිස් ටිකක් වැනි සුළු හොරකමකිනි. එදින ඔහු පදමට සප්පායම්වී ගෙදර යමින් සිටි අවස්ථාවේ අසල ඉඩමක තිබෙන සරු ගම්මිරිස් වගාවක් ගැන සිහිවිය. හෙට දවසේ වියදම සඳහා ගම්මිරිස් ටිකක් කඩා ගැනීමට ? බෝවී තිබූ අවස්ථාව හොඳ නිසා ගෙදර ගොස් මල්ලක් රැුගෙනවිත් වත්තට ඇතුළු විය. ටික වේලාවක් ගම්මිරිස් කඩන විට තද නිදිමතක් දැනුනේය. අතේ තිබූ මල්ල බිම එලාගෙන හාන්සිවූ ඔහුට තදින් නින්දගොස් තිබේ.

මේ දිනවල ගම්මිරිස් මිල අධික බැවින් තම වගාව ආරක්ෂා කරගැනීමට ඉඩම් හිමියා අවදියෙන් සිටී. ඔහු වත්තේ ඇවිදගෙන යනවිට තද නින්දේ පසුවූ හොරා අතටම අසුවිය. අසල තිබූ පොල්ලක් අතට ගෙන ඔහුට දිගට හරහට තඩිබාන්නට විය. වෙරි මරගාතේ සිටි හොරා ‘‘බුදු අම්මෝ’’ කියා මරහඬ දෙමින් දුවන විට කලබලය ඇසී පැමිණි අසල්වැසියෝ හොරා හඳුනාගත්හ.

දැන් ඔහු දුටුතැන ‘‘හොඳට නින්ද ගියාදැයි’’ අසද්දී කියන වචන ලියන්නට බැරිය.